४ मंसिर, एजेन्सी ।
पाकिस्तानको संसदले बुधबार पारित गरेको एक विधेयकबाट धेरैपटक बलात्कार गरकेाे प्रमाणित भएमा आजीवन नपुंसक बनाउनेसम्बन्धी दफा हटाइएको छ । कानुन तथा न्याय मन्त्रालयकी संसदीय सचिव मलीका बोखारीले फौजदारी कानुनसम्बन्धी परिमार्जित विधेयकबाट बलात्कारीको ‘केमिलक कास्ट्रेशन’ अर्थात् रासायनिक बन्ध्याकरणसम्बन्धी दफा हटाइएको बताएकी हुन् ।
बुधबार प्रधानमन्त्री इमरान खानको नेतृत्वमा रहेको सरकारले संसदको संयुक्त सत्रबाट बलात्कारीलाई औषधि दिएर आजीवन नपुंसक बनाउने एउटा विधेयक पारित गरेकाे थियाे ।
इस्लामिक विचारधारा परिषद्ले बलात्कारीको केमिलक कास्ट्रेशन गैर-इस्लामिक भएको भन्दै आपत्ति जनाएपछि संसदबाट उक्त विधेयक पारित हुनुपूर्व नै सम्बन्धित दफा हटाइएको बोखारीको भनाइ छ ।
इस्लामावादमा शुक्रबार आयोजित पत्रकार सम्मेलनमा बोल्दै बोखारीले भनिन्, ‘संविधानको धारा २२७ ले समेत हरेक कानुन शरिया र पवित्र कुरानअनुसार हुनुपर्ने प्रत्याभूत गरेको छ । तसर्थ, हामीले यी (इस्लामिक) मूल्य-मान्यताविपरीत हुने कुनै पनि कानुन पारित गर्न सक्दैनौं ।’
बोखारीका अनुसार कानुन मन्त्रीको मार्गदर्शनबमोजिम एउटा सरकारी समितिले विस्तृत छलफल गरेपछि विधेयकबाट केमिकल कास्ट्रेशनसम्बन्धी दफा हटाइएको थियो ।
त्यस्तै, पत्रकार सम्मेलनमा बोल्दै बलात्कारसम्बन्धी घटनाको स्वास्थ्य परीक्षणका लागि हरेक जिल्लामा ‘प्रतिबलात्कार सेल’ स्थापना गरिने समेत बोखारीले बताइन् ।
