१५ पुस, काठमाडौं ।
नेकपा माओवादी केन्द्रको आपतकालीन स्थायी समिति बैठक सुरु भएको छ।
अध्यक्ष पुष्पकमल दाहाल प्रचण्डको प्रतिवेदनमाथि सुझाव दिने क्रममा बुधबार प्रदेश २ बाट बन्द सत्रका अध्यक्ष मण्डल गिरिराजमणि पोखरेललाई अपराधी भनिएबारे छानबिन गर्न माग भएपछि स्थायी समितिको आपतकालीन बैठक बसेको हो।
आफूलाई एकजना महाधिवेशन प्रतिनिधिले अपराधी भनेपछि पोखरेल बिहीबारको बन्दसत्रमा उपस्थित भएका छैनन्। बुधबार प्रदेश २ को समूहबाट नेता सत्यनारायण भगतले प्रचण्डको प्रतिवेदनमाथि सुझाव दिने क्रममा आक्रोशित हुँदै गिरिराजमणिलाई अपराधीको संज्ञा दिएका थिए।
नेता चन्द्रप्रकाश खनाल बलदेवका अनुसार अहिले प्रज्ञा प्रतिष्ठानमै बैठक सुरु भएको छ। अपराधी भन्ने नेताबारे पार्टीले धारणा सार्वजनिक गर्न केही प्रतिनिधिले माग गरेपछि स्थायी समितिमै छलफल गर्न लागिएको एक नेताले बताए।
