८ असार,एजेन्सी । भारतको सत्तारुढ दल भारतीय जनता पार्टी भाजपा र उसका सहयात्री दल अर्थात एनडीए गठबन्धनबाट द्रौपदी मुर्मूलाई राष्ट्रपतिको उम्मेदवार बन्ने भएकी छिन् ।
उनी झारखण्डमा पहिलो महिला तथा आदिवासी राज्यपाल बनेकी थिइन् ।
६ वर्ष राज्यपाल बनेकी उनी त्यसपछि उनी गृहनगर ओडिसाको रायरंगपुरमा बस्दै आएकी थिइन् ।
राजधानी दिल्लीमा बसेको एनडीएका बैठकले आफूलाई राष्ट्रपतिको उम्मेदवार बनाएको जानकारी उनले १६०० किलोमिटर टाढाको आफ्नो गाउँमा टेलिभिजनमार्फत थाहा पाएकी थिइन् ।
उनले स्थानीय सञ्चारमाध्यमसँग भनिन्, ‘म आश्चर्यचकित भएको छु र खुसी पनि छु किन कि मलाई राष्ट्रपतिको उम्मेदवार बनाइएको छ, मैले टेलिभिजिनमा समाचार हेरेर थाहा पाएँ ।’ जुन २० अर्थात २ दिनअघि ६४औं जन्मदिन मनाएकी उनले संविधानले दिएको अधिकार अनुसार काम गर्ने बताइन् ।
सन् २०१७ को राष्ट्रपति चुनावमा पनि उनको नाम चर्चामा आएको थियो । तर त्यतिबेला एनडीएले रामनाथ कोबिन्दलाई राष्ट्रपति बनाएको थियो ।
यसपटक विपक्षी गठबन्धनले भने विजेपीका पूर्व नेता यशवन्त सिन्हालाई राष्ट्रपतिको उम्मेदवार बनाउने भएका छन् ।
पूर्वमन्त्री समेत रहेका सिन्हा पछिल्लो समयमा प्रधानमन्त्री नरेन्द्र मोदीको कार्यशैलीको विरोधमा थिए, मोदीको आलोचक रहेका उनी केही समयअघि मात्रै बीजेपीबाट अलग भएका थिए । उनी ममता बनर्जीको दल तृणमूल कंग्रेसमा आवद्ध छन् ।
भारतमा १८ जुलाईमा राष्ट्रपतिको चुनाव हुँदै छ र त्यसका लागि २९ जुनसम्ममा मनोनयन दर्ता गरिसक्नु पर्ने छ । २१ जुलाईमा नयाँ राष्ट्रपति पाउने छ ।
