१४ असार,विराटनगर । प्रदेश १ को राजधानी विराटनगरको पूर्वी सीमा भएर बग्ने सिंघिया खोलामा गएरातिदेखि परेको अविरल वर्षापछि आएको बाढी विराटनगरका बस्तीमा पस्दा २५ घरपरिवार विस्थापित भएका छन्।
खोला गाउँ पसेपछि २५ घर डुबानमा परेका हुन् । बाढी विराटनगर महानगरपालिका ८ खोला किनार नजिक रहेको बस्तीमा पसेको प्रहरीले बताएको छ।
खोला किनारमा रहेका अन्य बस्ती पनि जोखिममा रहेको मोरङ प्रहरीले जनाएको छ ।
विस्थापित भएकाहरुलाई नेपाल प्रहरी र स्थानीयवासीको सहयोगमा उद्धार गरी सुरक्षित स्थानमा सारिएको जनाइएको छ।
यस्तै मोरङको कटहरी गाउँपालिका र विराटनगर महानगरका खोला छेउका अन्य बस्तीमा पनि बाढी पसेको छ ।
विराटनगर २ को बस्तीमा पनि खोलाको बाढी पसेको छ । खोलाको जलसतह अहिले पुल नजिकै पुगेपछि विराटनगर महानगरपालिकाका मेयर नागेश कोइराला बाढीको स्थलगत अवलोकन गर्नका लागि त्यस क्षेत्रमा पुगेका छन् ।
खोला किनार छे्उमा रहेका वस्तीहरु हरेक वर्षको बाढीका कारण डुबानमा पर्दै आएका छन् ।
वर्षा सुरु भएपछि रातभर जाग्राम बस्नु परेको स्थानीयले बताएका छन् ।
