१७ असार ,काठमाण्डौ । राष्ट्रिय प्रजातन्त्र पार्टीले केन्द्रीय समिति बैठक बोलाएको छ । साउन ५ र ६ गते काठमाडौंमा केन्द्रीय समिति बैठक बस्नेछ ।नेता मोहन श्रेष्ठका अनुसार बैठकमा स्थानीय तह चुनावको समीक्षा, प्रतिनिधिसभा र प्रदेशसभा सदस्यको निर्वाचन तयारीलगायत विषयमा छलफल हुनेछ । बैठकमा समसामयिक राजनीतिका विषयमा पनि छलफल हुने उनले बताए ।देशैभरबाट सहभागी हुने नेताले सम्बन्धित जिल्लामा पार्टीले सञ्चालन गरेका राजनीतिक तथा सामाजिक कार्यबारे बैठकमा रिपोर्टिङ गर्नेछन् ।सातै प्रदेशमा संगठनको अवस्था, कार्ययोजनाबारे प्रदेश प्रमुखले जानकारी गराउनुका साथै आगामी प्रदेश र सङ्घीय निर्वाचनमा जनवर्गीय सङ्गठन परिचालन गरी पार्टीलाई धेरै स्थानमा विजयी बनाउन आवश्यक रणनीति बैठकमा तयार पारिने छ ।
