४ भदौ ,एजेन्सी ।
उत्तरी क्यालिफोर्नियाको ग्रामीण इलाकाको एउटा विमानस्थलमा अवतरण गर्ने क्रममा दुईवटा साना विमानहरू ठोक्किँदा तीन जनाको मृत्यु भएको छ । सान्ता क्रुज काउन्टी शेरिफको कार्यालयले एक विज्ञप्ति जारी गर्दै वाटसनभिल नगरपालिका एयरपोर्टमा विमान दुर्घटनामा परी मारिएकाहरूको नाम उनीहरूको परिवारलाई सूचित गरेपछि जारी गरिने जनाएको छ ।
नेशनल ट्रान्सपोर्टेशन सेफ्टी बोर्ड एयर सेफ्टी अन्वेषक फाबियन सालाजारले दुई इन्जिन सेसना ३४० मा दुई जना र एउटा कुकुर र एक इन्जिन सेसना १५२ मा पाइलट मात्र रहेको पुष्टि गरेको सीएनएनले जनाएको छ ।उनीहरु सबैको मृत्यु भएको छ ।
सालाजारले भनेका छन् “एउटा विमान निर्धारित रुटमा उडिरहेको देखिन्छ र अर्को विमान विमानस्थलमा अवतरण गर्न लागेको थियो। रेकर्ड अनुसार, एकल इन्जिन सेसना १५२ मोन्टेरी बे एभिएसन इंक मा दर्ता गरिएको थियो। सेसना ३४० एएलएम होल्डिङ एलएलसीमा दर्ता गरिएको थियो ।
सालाजारले अन्वेषकहरूले अझै प्रमाणहरू सङ्कलन गरिरहेको र प्रत्यक्षदर्शीहरूसँग कुरा गर्ने बताएका छन् । उनले दुई साताभित्र घातक दुर्घटनाको प्रारम्भिक रिपोर्ट आउने अपेक्षा गरिएको बताएका छन् । वाटसनभिल मोन्टेरी बे नजिकैको ग्रामीण क्षेत्र हो जुन सान फ्रान्सिस्कोबाट १६० किलोमिटर दक्षिणमा छ। दुई विमान आपसमा ठोक्किनु दुर्लभ दुर्घटना हो ।
यसअघि अमेरिकामै दुई साना जहाज एक आपसमा ठक्कर खादा दुई पाइलटको मृत्यु भएको थियो । यस्तै सुडानको खार्तुमबाट इथियोपियाको राजधानी अदिस अबाबाका लागि उडेको विमान केही दिन अघि भएको भयानक दुर्घटनाबाट जोगिएको थियो ।
उडानका दुवै पाइलट अवतरणअघि नै गहिरो निद्रामा परेका थिए । जसका कारण बोइङ ७३७ विमान अदिस अबाबा एयरपोर्टमा अवतरण हुन सकेको थिएन । दुर्घटना नजिक पर्दा विमान ३७ हजार फिटको उचाइमा उडिरहेको थियो ।
