१२ भदौ , एजेन्सी ।
भारतीय सत्तारुढ दल भारतीय जनता पार्टीकी चर्चित नेतृ सोनाली फोगाटको हत्यामा संलग्न उनका पीए सुधीर सांगवान र साथी सुखविन्दर वासीलाई गोवा प्रहरीले पक्राउ गरेको छ। दुबैलाई अदालतमा पेश गरेपछि उनीहरुलाई १० दिनको प्रहरी हिरासतमा पठाइएकोे छ । सोनालीका परिवारले सुधीरमाथि हत्या र बलात्कारको आरोप लगाएका छन् । साथै परिवारजनको आग्रह पछि हरियाणाका मुख्यमन्त्रीले गोवाका मुख्यमन्त्रीलाई यो हत्या प्रकरणको अनुशन्धानको जिम्मा सीआईबीलाई दिन आग्रह गरेका छन् ।
सुरुवातामा सोनालीको ह्दयघातका कारण मृत्यु भएको बताएको गोवा प्रहरीले २५ अगस्टमा सोनालीको मृत्यु प्रकरणमा हत्याको धारा पनि थपेको थियो। जब फोगाट २२ अगस्टमा गोवा पुगेकी थिइ संगवान र वासी उनीसँगै थिए। फोगाटलाई हृदयघातको शंका लागेपछि मंगलबार बिहान उत्तरी गोवा जिल्लाको अन्जुनास्थित सेन्ट एन्थोनी अस्पतालमा लगिएको गोवा प्रहरीले बताएको थियो। उनलाई अस्पतालमा मृत घोषणा गरिएको थियो ।
यसपछि प्रहरीले अस्वाभाविक मृत्युको मुद्दा दर्ता गरेको थियो । तर बिहीबार पोस्टमार्टम रिपोर्ट आएपछि प्रहरीले हत्या र बलात्कारको मुद्दा दर्ता गर्याे । रिपोर्टका अनुसार सोनालीको शरीरमा धेरै चोटका निशान छन् । फोगाटको रिपोर्टमा “शरीरमा धेरै पटक कुनै वस्तुले जबरजस्ती प्रहार गरेको“ उल्लेख गरिएको भारतीय संचारमाध्यामहरुले उल्लेख गरेका छन् । त्यसलगत्तै बाहिरिएको सीसीटिभी फुटेजमा सोनाली लर्खराउदै एक ब्यक्तिको साथमा शौचालय तर्फ गईरहेको देखिएसँगै उनलाई ड्रक्स दिएको पनि खुलासा भएको थियो ।
जुन खुलासाले सोनालीको मृत्यु प्रकरण हत्या प्रकरण बनेको नवभारत टाईम्सले उल्लेख गरेको छ । घटनामा जोडिएका सुधीर सांगवानले २०१९ को हरियाणा विधानसभा चुनावमा सोनाली फोगाटसँग भेट गरेका थिए। पछि सुखविन्दरले सोनालीसँग पनि काम गरे । इन्स्टाग्राममा पोष्ट गरिएका तस्विरमा सोनाली फोगाटसँग सुधीर सांगवान पनि देखिएको भारतीय संचारमाध्यामहरुले उल्लेख गरेका छन् ।
यति मात्र होइन, जब सोनाली बिग बोसमा आबद्ध भइन सुधीरले उनलाई बाहिरबाट धेरै सपोर्ट गरेका थिए । हरियाणा विधानसभा चुनावमा सुधीरसँग भेट भएपछि सोनाली आदमपुरबाट प्रचारप्रसार गरिरहेकी थिइन् । सोनाली लगातार राजनीतिमा काम गर्न चाहाने भएकाले उनले सुधीरलाई निजी सहायक नियुक्त गरेको मिडिया रिपोर्टहरुमा उल्लेख छ । सुधीर सांगवान मूल रूपमा हरियाणाको गोहानाको खेडा गाउँका हुन्।
उनकी श्रीमती सरकारी शिक्षिका भए पनि परिवारका सदस्य सुधीरसँग सम्पर्कमा छैनन् । सुधीर सांगवान सन् २०१५–१६ मा रोहतकको सेक्टर २ मा भाडाको घरमा बस्दै आएका थिए । तर, खराब व्यवहारका कारण घरधनीले जबरजस्ती घर खाली गराएका थिए । सोनाली फोगाट मृत्यु प्रकरणमा सुधीरसँगै पक्राउ परेका सुधीर वासी सोनालीको साथी रहेको बताइएको छ । यद्यपि मिडिया रिपोर्टका अनुसार उनले सोनालीलाई सुधीरमार्फत भेटेका थिए ।
सुखविन्दर मूल रूपमा हरियाणाको चरकिदाद्री जिल्लाको मन्डोला गाउँका बासिन्दा हुन् । सुखविन्दरले हरियाणाका विवादित विधायक गोपाल कान्डासँग पनि काम गरिसकेका छन् । सोनालीका भाइ रिंकु ढाकाले गोवा प्रहरीमा दिएको उजुरीमा सुधीर र सुखविन्दरविरुद्ध गम्भीर आरोप लगाएका छन् । रिंकुले सुधीरमाथि सोनालीलाई बलात्कार गरेको आरोप लगाएका छन्।
यस्तै सुधीरले लामो समयदेखि सोनालीलाई बलात्कारको भिडियो बनाएर ब्ल्याकमेल गरिरहेको पनि बताएका छन् । सोनालीलाई सुधीरले आफ्नो नियन्त्रणमा राखेको भन्दै परिवारसँग कुरा गर्न नसकेको आरोप पनि रहेको छ । सोनालीका पतिको केही वर्ष पहिलेनै मृत्यु भईसकेको छ भने उनी एक छोरी रहेकी छिन् ।
