१३ भदौ , एजेन्सी ।
एक वर्ष पहिले अमेरिकन डलरको बिक्रीदर भन्दा २० रुपैयाँको महँगा रहेको युरोपियन युरो अहिले डलरको बिक्रीदर भन्दा सस्तो भएको छ । एक वर्षको अन्तरालमा युरोको मूल्य घटेको छ भने डलरको मूल्य बढेको छ । गत वर्षको भदौ १२ गते अमेरिकन एक डलर खरिद गर्न नेपाली ११८ रुपैयाँ २० पैसा खर्चनु पर्दथ्यो । एक युरो खरिदका लागि नेपाली १३८ रुपैयाँ ९८ पैसा खर्चनु पर्दथ्यो ।
तर, यो एक वर्षको बीचमा डलरको मूल्य १० रुपैयाँ बढेको छ भने युरोको मूल्य १० रुपैयाँभन्दा बढीले घटेको छ ।नेपाल राष्ट्र बैंकले आज सोमबार एक युरोको बिक्रीदर १२७.६२ रुपैयाँ तोकेको छ । जब कि अमेरिकन एक डलरको बिक्रीदर १२८.०९ रुपैयाँ रहेको छ । आज युरोको मूल्यभन्दा अमेरिकन डलरको मूल्य ४७ पैसा बढी रहेको राष्ट्र बैंकले जनाएको छ ।
एक वर्षको अमेरिकन डलर र युरोको मूल्यमा अत्यन्तै उतारचढाव देखिएको छ । रूस र युक्रेनबीचको द्वन्द्वका कारण युरोको मूल्य कमजोर भएको अर्थविद्हरुको बुझाइ छ । रुसमाथिको प्रतिबन्धपछि धर्मराएको युरोपको अर्थतन्त्र र सन्निकट संकटको असरले यसले गर्दा युरोपियन मुलुकमा लगानीको सुरक्षा कम भएको भन्दै लगानीकर्ता आफ्नो लगानी फिर्ता लिएर अमेरिका जाने क्रम बढेकाले युरोको मूल्य कमजोर भएको अर्थविद्हरुले बताएका छन् ।
अहिले अमेरिकाले ब्याजदर बढाएकाले पनि विश्वभरका ब्यापारीहरू अमेरिका नै पलायन भएको विश्लेषण गरिएको छ । यसले गर्दा पनि अमेरिकन डलरको मूल्य निरन्तर बढ्दै गएको छभने त्यसको दाँजोमा युरो कमजोर बनिरहेको छ । एक वर्षको अन्तरालमा अमेरिकन डलरको मूल्य बलियो हुँदै गएको छ भने युरोपियन युरोको मूल्य कमजोर हुँदै गएको छ ।
यस्तै जलवायु परिवर्तनले गर्दा पनि युरोपियन मुलुकहरूमा आर्थिक गतिविधि कम हुँदै गएकोले युरोको मूल्य कमजोर हुँदै गएको विश्लेषण गरिएको छ । आज नेपाल राष्ट्र बैंकले एक अमेरिकन डलरको खरिददर १२७.४९ रुपैयाँ र एक युरोको खरिददर १२७.०२ रुपैयाँ राष्ट्र बैंकले तोकेको छ ।
