१६ भदौ , एजेन्सी ।
भीषण बाढीका कारण अस्तव्यस्त बनेको पाकिस्तानको ३३ प्रतिशत भाग अहिले डुबानमा छ । मध्य जुन महिनाबाट सुरु भएका वर्षापछि बाढी निरन्तर रहदा बाढीको कहरका कारण पाकिस्तानमा हालसम्म १ हजार १६२ जनाको मृत्यु भइसकेको छ । यस्तै, ३ करोड ३० लाख भन्दा बढी मानिस प्रभावित हुँदा ३ हजार भन्दा बढी मानिस घाइते भएका छन् ।
बाढीकै कारण सिन्ध प्रान्तमा १०० किलोमिटर लामो ताल बनेको छ । नासाको मोडिज् स्याटलाइट सेनसरले लिएको तस्विरमा इन्डस नदीको बहाव बढ्दा सिन्ध प्रान्तमा ६२ माइल लामो ताल नै बनेको हो । बाढीले डुबानमा परेको अधिकांश क्षेत्र खेतीयोग्य जमिन रहेको स्थानीय अधिकारीहरुले बताएका छन् । सिन्ध र बलुचिस्तान प्रान्तमा औशत् भन्दा ५०० प्रतिशत बढी वर्षा भएको छ ।
यस वर्षको बाढीलाई सन् २०१० को विनाशकारी बाढीसँग तुलना गरिएको छ । पाकिस्तानको इतिहासमा सबैभन्दा विनाशकारी उक्त बाढीका कारण २ हजारभन्दा बढी मानिसको मृत्यु भएको थियो । बाढीले ठूलठूला घरहरु बगाएको छ । यस्तै, अर्बौंको क्षति भएको छ । दुई लाख ८७ हजारभन्दा बढी घरहरू पूर्ण रूपमा नष्ट भएका छन् ।
करिब सात लाख ३५ हजार भन्दा बढी पशुपंक्षी नष्ट भएका छन् भने २० लाख एकड जमिनमा लगाइएको बालीनालीमा प्रतिकूल असर परेको छ । पाकिस्तान सरकारले यो बाढीलाई जलवायु परिवर्तनको उपज भनेको छ । संयुक्त राष्ट्रसंघले पनि बाढीलाई जलवायु परिवर्तनकै कारण भएको जनाएको छ ।
विश्व स्वास्थ्य संगठन (डब्ल्यूएचओ) ले पाकिस्तानमा विनाशकारी बाढीका कारण ६४ लाखभन्दा बढी मानिसलाई मानवीय सहायताको खाँचो रहेको बताएको छ । पाकिस्तान सरकारले पनि राष्ट्रिय आपतकाल घोषणा गरेको छ भने ६६ जिल्लालाई ‘विपत्तिग्रस्त’ क्षेत्र घोषणा गरेको छ ।
डब्ल्यूएचओलेको रिपोर्ट अनुशार पाकिस्तानका १५४ जिल्लाहरू मध्ये ११६ जिल्लाहरू प्रभावित भएका छन् । बाढीको कारण देशका ८८८ स्वास्थ्य संस्थामा क्षति पुगेको छ, जसमध्ये १८० वटा पूर्ण रुपमा क्षतिग्रस्त भएका छन् ।
विश्व स्वास्थ्य संगठनले देशको स्वास्थ्य प्रणालीले कोभिड–१९, हैजा, टाइफाइड र दादुराजस्ता विभिन्न समसामयिक स्वास्थ्य खतरासँग जुधिरहेको जनाएको छ । संयुक्त राज्य अमेरिकाले पाकिस्तानमा भीषण बाढीबाट प्रभावित व्यक्ति र समुदायलाई सहयोग गर्न थप तीन करोड अमेरिकी डलरको जीवन रक्षक मानवीय सहायताको घोषणा गरेको छ ।
