१५ असोज, एजेन्सी ।
आफ्नो झन्डै चार वर्षे कार्यकाल पूरा गरेर अमेरिकी राजदूत ¥यान्डी डब्लु बेरी नेपालबाट आइतबार स्वदेश फर्किँदै छन् । उनी नामिबियाका लागि नयाँ अमेरिकी राजदूतमा सिफारिस भएसँगै नेपालबाट अमेरिका फर्किएका हुन् । अमेरिकाबाट नेपालमा नयाँ राजदूतको रुपमा डिन थम्प्सन आउने निर्णय भइसकेको छ ।
नयाँ अमेरिकी राजदूत थम्प्सनले शुक्रबार वासिङ्टन डीसीमा पदको शपथग्रहण गरिसकेका छन् । उनी केहि दिनभित्रमै नेपाल आउने कार्यक्रम छ । अमेरिकी राजदूत ¥यान्डी बेरीको चारवर्षे कार्यकालको सबैभन्दा ठूलो सफलता भनेकै अमेरिकी सहयोग परियोजना मिलेनियम च्यालेन्ज कर्पोरेसन (एमसीसी) नेपालको संसद्बाट अनुमोदन हुनु हो ।
नेपालको संसद्ले गत वर्षको फागुन १५ मा १२ बुँदे व्याख्यात्मक घोषणासहित उक्त सम्झौता अनुमोदन गरेको थियो । तर बेरीकै कार्यकालमा यहि असार ६ गते नेपाल सरकारले अमेरिकी सैन्य सहकार्य परियोजना स्टेट पार्टनरसिप कार्यक्रम (एसपीपी) अघि नबढाउने घोषणा गरिदियो ।
अमेरिकी अनुदान एमसीसीलाई लिएर चिनियाँ पक्षले नेपाल र बेइजिङबाट पटक–पटक टिप्पणी पनि गरेको थियो । बेरीले नेपाल छोड्नु अघि राष्ट्रपति, प्रधानमन्त्री तथा विभिन्न दलका प्रमुखहरुसँग विदाई भेट गरेका थिए । उनले आज नेपालबाट विदा हुदै गर्दा आफ्नो जीवनकथामा एउटा अध्याय नेपाली र अमेरिकीहरूको सम्बन्धको ईतिहासको बारेमा पनि समावेस हुने सौभाग्य प्राप्त गरेकोमा अत्यन्तै कृतज्ञ भएको बेरीले उल्लेख गरेका छन् ।
सामाजिक संजालमा उनले लेखेका छन् , मैले यहाँहरूबाट व्यक्तिगत रूपमै अनुभव गर्न पाएको अनेकौं माया, सद्भाव र सत्कारका क्षणहरूका लागि सदैव आभारी रहनेछु। उनले थप लेखेका छन्, यो देशको भविष्यका विषयमा म अत्यन्तै आशावादी छु किनभने मैले यहाँका नागरिकहरू, भुभाग, विश्वास र संस्कृतिलाई अत्यन्तै राम्ररी बुझ्ने सुअवसर प्राप्त गरेको छु।
नेपालबाट अमेरिकी राजदूत बेरी स्वदेश फर्किएको समाचार आउँदै गर्दा नेपालको उत्तरी छिमेकी चीनकी राजदूत होउ यान्छी पनि आफ्नो चार वर्षे कार्यकाल पूरा गरी स्वदेश फर्किन लागेकी छन् ।राजदूत होउ अब दक्षिण–पूर्वी एसियाली राष्ट्रहरूको संगठन एसोसिएसन अफ साउथ इस्ट एसिएन नेसन्स (आसियान) क्षेत्रको राजदूत हुन लागेकी हुन् । यान्छी पछि चीनबाट नेपाल आउने नयाँ राजदूतको घोषणा भने बेइजिङले गरिसकेको छैन् ।
