व्हिलचेयरमा रहेका ब्यक्तिलाई महानगरले किन उठायो ? बालेन र नगर प्रहरीको आलोचना..

२० माघ, काठमाण्डौ ।
काठमाडौं महानगर प्रहरीद्वारा व्हिलचेयरमा रहेका एक अशक्त पुरुष पक्राउ गरेको विषय अहिले प्रमुख आलोचनाको केन्द्र बनेको छ । सामाजिक संजालमा भाइरलभएको तस्बिरमा एकजना शारीरिक रुपमा फरक क्षमता भएका अपाङता वरण गरेका व्यक्तिलाई महानगर प्रहरीको ट्रकको पछिल्लो भागमा राखिएको देख्न सकिन्छ ।

तस्बिर सार्वजनिक भएसँगै जीविकोपार्जनका लागि बाटोमा मास्क बेचिरहेका उनलाई महानगर प्रहरीले पक्राउ गरेर ज्यादती गरेको भन्दै महानगर प्रहरीको चर्को आलोचनासमेत सुरु भएको छ । महानगरले यसरी उठाएका ब्यक्ति भने दोलखा सैलुङ गाउँपालिका–८ का ५२ वर्षीय डिल्लीबहादुर कार्की हुन् ।

डिल्लीबहादुरलाई निर्माणाधीन काठमाडौं भ्यूटावरको ठीक अगाडि पट्टीको सडक किनाराको एक कुनाबाट नगर प्रहरीले उठाएको थियो । बुधबार डिल्लीबहादुर ह्विलचेयरमा बसेर पानी, मास्क र चुरोट बेच्दै बेच्दैथिए । दिउँसो २ बजे काठमाडौं महानगरपालिकाको नगर प्रहरीको टोलीले ह्विलचेयरमा रहेका कार्कीलाई जबरजस्ती ह्विलचेयर र उनका सामग्रीसहित ट्रकमाथि चढाएका थिए ।

डिल्लीबहादुर रोए, फेरि यस्तो नगर्ने अनुनय विनय गरे तर नगर प्रहरीले सुनेनन् । त्यसपछि भ्यूटावर नजिकैबाट ट्रकको पछाडि ह्विलचेयरमा कार्कीलाई एक्लै राखेर बसन्तपुर हुँदै टेकुस्थित महानगर कार्यालय पु¥याएको थियो । उक्त तस्बिर सामाजिक सञ्जालमा भाइरल भएपछि नगर प्रहरी र काठमाडौं महानगरपालिकाका मेयर बालेन शाहको चर्को आलोचना भइरहेको छ ।

यता आलोचना भएपछि सडकबाट अपाङ्गता भएका व्यक्तिलाई महानगरले पक्राउ ग¥यो भनेर प्रकासन भएको समाचारप्रति ध्यानाकर्षण भएको महानगर प्रहरी बलले बताएको छ । दोलखा घर भएका कार्कीलाई सहयोग आवश्यक रहेको अवस्थामा प्रहरीले मानव सेवा आश्रममा लैजानका लागि गाडीमा राखेको महानगर प्रहरीले जनाएको छ ।

यस क्रममा उनीमाथि कुनै पनि प्रकारको बल प्रयोग गरिएको छैन । उनी सडकमा चुरोट तथा गुट्खालगायतका बस्तु विक्री गरिरहेका थिए । विषयमा जानकारी दिँदै महानगर प्रहरी बलका प्रमुख नगर प्रहरी उपरीक्षक राजुनाथ पाण्डेले भनेका छन्, ‘सडकमा भएका सहयोगापेक्षीहरुलाई उद्धार गरेर हामीले मानव सेवा आश्रममा बसोबास प्रबन्ध गर्ने गरेका छौँ ।

स्वास्थ्योपचार गरिदिने र सम्भव भएसम्म पारिवारिक पुनमिलन गराउने काम गरिरहेका छौँ । कार्कीलाई महानगर प्रहरी बलको गाडीमा राख्नुको उद्देश्य पनि त्यही हो । यस विषयलाई मानवीयतासँग जोडेर प्रचार भएको देखियो । यस्तो प्रचार गलत हो । हामी मानवीयताको सहर बनाउने अभियानअन्तर्गत सडक सहयोगापेक्षीहरुको व्यवस्थापन गरिरहेका छौँ । कार्कीलाई गाडीमा राख्नुको कारण यही कार्यक्रमको निरन्तरता हो ।’

२०७३ सालमा कार्की रुखबाट लडेका थिए । त्यसपछि उनको ढाड भाँचिएको थियो । त्यसपछि उनी उपचारका लागि श्रीमतीसहित काठमाडांै आएका थिए । उपचारकै क्रममा गाउँमा भएको ९ रोपनी जग्गा बेचेपनि उनको उपचार सफल भएको थिएन ।डिल्लीबहादुरको ढाडभन्दा मूनिको शरीर चल्दैन । उनी दिसा पिसाबसमेत आफैँ गर्न सक्दैनन् ।