१० चैत,एजेन्सी ।
आगामी सेप्टेम्बरमा हुने तय एकदिवसीय एसिया कप पाकिस्तानमा हुँदैछ । तर पाकिस्तानमा एसिया कपमा सहभागि भारतबाहेकका टिमका मात्र खेल हुने भएको छ। क्रिक इन्फोका अनुसार भारत र पाकिस्तान एकअर्काविरुद्ध पाकिस्तान बाहिर खेल्न सहमत भएका छन्।
भारतको खेल हुने स्थानको तय भइसकेको छैन। युएई, ओमान, श्रीलंका र इङ्ल्यान्डमा एक सम्भावित आयोजना स्थल हुन् सक्नेछ । भारत र पाकिस्तानसँगै यस वर्षको एसिया कपमा ६ टिम भिड्दैछन्। एउटा समूहमा भारत, पाकिस्तान र एसिसी प्रिमियर कप विजेताबीच प्रतिस्पर्धा हुनेछ।
एसिसी प्रिमियर कप आगामी महिना नेपालमा हुँदैछ। यसमा विजयी भए नेपालले भारत र पाकिस्तानसँग खेल्ने पक्का हुने छ । एसियन क्रिकेट काउन्सिल (एसिसी) ले प्रतियोगिता वैशाख ५ देखि वैशाख १८ सम्म कीर्तिपुरस्थित त्रिवि मैदान र मुलपानी मैदानमा हुने खेल तालिका सार्वजनिक गरेको छ ।
जसमा नेपाल समूह ‘ए’ मा परेको छ। नेपालको समूहमा ओमान, कतार, मलेसिया र साउदी अरेबिया छन्। समूह ‘बी’ मा युएई, हङकङ, कुवेत, सिंगापुर र बहराइन छन्। नेपालले पहिलो खेल मलेसियासँग वैशाख ५ मा त्रिवि मैदानमा खेल्नेछ।
यस्तै दोस्रो खेल ओमानसँग वैशाख ८ मा त्रिविमा, तेस्रो खेल मुलपानी मैदानमा साउदी अरेबियासँग वैशाख ११ गते र अन्तिम खेल वैशाख १४ गते कतारसँग त्रिवि मैदानमा खेल्नेछ। समूहका शीर्ष दुई टिम सेमिफाइनल पुग्नेछन्। सेमिफाइनल वैशाख १६ र फाइनल वैशाख १८ गते हुनेछ ।
यस्तै एसिया कपको अर्को समूहमा श्रीलंका, बंगलादेश र अफगानिस्तान छन्। फाइनल सहित १३ दिनमा कुल १३ खेल हुनेछन्। २०२२ को एसिया कपको ढाँचा अनुसार प्रत्येक समूहबाट शीर्ष दुई टोली सुपर ४ मा पुग्छन् र शीर्ष दुई टोलीले फाइनलमा प्रतिस्पर्धा गर्छन्। यो ढाँचाअनुसार भारत र पाकिस्तानबीच तीन पटक खेल्ने सम्भावना कायमै छ। सुरक्षाका कारण देखाउँदै पाकिस्तानमा खेल्न भारतले अनाकानी गरिरहेको थियो।
एसिया कपको केही खेल पाकिस्तान बाहिर आयोजना गर्ने विकल्पका लागि एसियाली क्रिकेट काउन्सिल (एसिसी) का सदस्यहरूले गत साता दुबईमा आइसिसीको त्रैमासिक बोर्ड बैठक हुँदै गर्दा अर्को बैठक गरेका थिए।
जहाँ सबैभन्दा अनुकूलको विकल्पमा जान सैद्धान्तिक रूपमा सहमति भएको थियो। मार्चको मध्यमा बहराइनमा भएको एसिसी बैठकमा निर्णयमा पुग्न असफल भएपछि फेरि दुबईमा दुई चरणको अनौपचारिक छलफल भएको थियो।
