२३ चैत,एजेन्सी ।
अहिले अमेरिकामा कानुनी लडाइँले चर्चा पाइरहेको छ । एकातिर पूर्व अमेरिकी राष्ट्रपति डोनाल्ड ट्रम्प छन् भने अर्कोतर्फ पोर्न स्टार स्टर्मी डेनियल छन् । ट्रम्पमाथि २०१६ को चुनावी अभियानका क्रममा डेनियललाई गोप्य भुक्तानी गरेको लगायत ३४ वटा आरोप लगाइएको छ।
न्युयोर्कको एक अदालतमा निर्णायक मण्डलले न्यायाधीशको अगाडि आरोपहरू राखेको छ र अब यस मुद्दाको अनुसन्धान सुरु भएको छ। तर अमेरिकाको अर्को अदालतले स्टर्मी डेनियललाई ठूलो झट्का दिएको छ । अदालतले आफ्नो फैसलामा डेनियललाई ट्रम्पविरुद्ध मानहानीको मुद्दामा १ लाख २२ हजार डलर तिर्न भनेको छ।
ट्रम्प मंगलबार म्यानहट्टन अदालत पुगेका थिए । उनले २०१६ को राष्ट्रपतीय अभियानका क्रममा वयस्क फिल्म अभिनेत्री स्टोर्मी डेनियललाई “उनको मुख बन्द राख्न“ रकम तिरेको आरोपसँग सम्बन्धित आपराधिक मुद्दामा उपस्थित भएका थिए। डेनियलले सन् २००६ मा ट्रम्पसँग अफेयर भएको र २०१६ को राष्ट्रपतीय चुनावअघि आफ्नो मुख बन्द राख्न १ लाख ३० हजार डलर तिरेको आरोप लगाएकी थिइन्।
अर्कोतर्फ, अमेरिकी पुनरावेदन अदालतले मंगलबार पूर्व राष्ट्रपति डोनाल्ड ट्रम्प विरुद्ध मानहानीको मुद्दामा डेनियलले १लाख २२ हजार डलरको कानुनी खर्च तिर्नुपर्ने फैसला सुनाएको छ। ट्रम्प विरुद्धको फौजदारी मुद्दामा अर्को सुनुवाइको मिति डिसेम्बर ४ मा तोकिएको छ, जसमा ट्रम्प व्यक्तिगत रुपमा उपस्थित हुनुपर्नेछ।
आपराधिक अभियोग लगाइएका ट्रम्प पहिलो अमेरिकी राष्ट्रपति हुन्। अदालतमा हाजिरी हुँदा ट्रम्पले आफूमाथिका ३४ वटा अपराधमा दोषी नभएको बताएका छन् । यस अनुसार ट्रम्प विरुद्धको आरोप लगत्तै अभियोजकहरूले आगामी ६५ दिनमा पर्याप्त प्रमाण पेश गर्ने अपेक्षा गरेका छन् ।
ट्रम्पको टोलीसँग याचिका दर्ता गर्न अगस्ट ८ सम्मको समय छ र अभियोजकहरूलाई सेप्टेम्बर १९ सम्म जवाफ दिनु पर्ने छ । न्यायाधीश मार्चेनले डिसेम्बर४ मा अर्को सुनुवाईमा फैसला गर्ने बताएका छन् । सो क्रममा तल्लो अदालतको डेनियललाई हर्जाना तिराउने फैसलाले समेत महत्व राख्न सक्ने अन्तराष्ट्रिय संचारमाध्यामहरुले उल्लेख गरेका छन् ।
