९ वैशाख, एजेन्सी।
अर्बपति एलन मस्कको स्वामित्वमा रहेको सामाजिक सञ्जाल ट्विटरले कम्पनीको नियमानुसार पैसा नतिर्ने प्रयोगकर्ताको ‘ब्लु टिक’ धमाधम हटाउन थालेको छ । कम्पनीको नयाँ नीतिअनुसार मासिक ८ डलर नतिर्ने प्रयोगकर्ताको ‘ब्लु टिक’ ट्विटरले शुक्रबारदेखि हटाउन थालेको हो ।
यसैक्रममा पोर्चुगिज फुटबल स्टार क्रिस्टियानो रोनाल्डोले पनि ‘ब्लु टिक’ गुमाएका छन् । विश्वमै सबैभन्दा धेरै फ्यान, फलोइङ भएका पोर्चुगिज फुटबल सुपरस्टार क्रिस्टियानो रोनाल्डोले पनि ट्विटरको ब्लु टिक गुमाएका हुन् । हाल साउदी अरबको अल नासरबाट व्यवसायिक फुटबल स्टार रोनाल्डोले मासिक ८ डलर नतिरेपछि ब्लु स्टिक हटाइएको हो ।
ट्विटरमा रोनाल्डोका १०८ मिलियन फलोअर रहेका छन् । ट्विटरले कयौँ ठूला सेलिब्रिटीहरुको पनि ‘ब्लु टिक’ हटाएको छ । ‘ब्लु टिक’ खोसिनेको सूचीमा बलिउड स्टारदेखि नेपालका प्रधानमन्त्रीसमेत रहेका छन् । बलिउडतर्फ अमिताभ बच्चन, सलमान खान, शाहरुख खान र अक्षय कुमार जस्ता कयौँ सुपर स्टार पनि छन् ।
बलिउडमा बिग बीका नाममा परिचित अमिताभ ट्विटरमा धेरै सक्रिय हुने सेलिब्रिटी हुन् । उनी ट्विटरमा लागतार आफ्ना विचार राखिरहेका हुन्छन् । ट्विटरमा सक्रिय भइरहने उनले शुक्रबार गरेको एउटा ट्विट अहिले भाइरल भइरहेको छ । एलन मस्कले एक महिनाअघिनै ‘ब्लु टिक’का लागि पैसा तिर्नुपर्ने बताइसकेका छन् ।
यस्तोमा जस जसले डलर तिरेका छन् उनीहरुको ‘ब्लु टिक’ यथावत छ । तर पैसा तिरेर पनि आफ्नो ‘ब्लु टिक’ खोसिएको भन्दै अमिताभले भने ट्विटरसँग गुनासो गरेका छन् । ’ए ट्विटर भाइ । सुनिरहेका छौँ? अब त पैसा पनि पठाइदिइसकेँ मैले… त्यसैले जुन निल कमल हुन्छ नि, हाम्रो नामअगाडि, त्यो त अब फिर्ता गरेर लगाइदेऊ भाइ, ताकि मानिसले मलाई म नै अमिताभ बच्चन हो भन्ने चिनुन् ।
हात पनि जोडिरहेको छु तिम्रासामु। अब अझै खुट्टा पनि जोड्नुपर्ने हो र?’ अमिताभ बच्चनको यो व्यंग्यसहितको ट्विट प्रयोगकर्ताहरुले निकै मन पराएर सेयर गरिरहेका छन् । बलिउडमा ‘ब्लु टिक’ हट्नेहरुको सूचीमा शाहरुख खान, सलमान खान, अमिताभ बच्चन, आलिया भट्ट, अभिषेक बच्चन, ऋतिक रोशन, बिपाशा बसु, अर्जुन रामपाल, अनुष्का शर्मा र फराह खानसहित कयौँ स्टार छन् ।
बलिउडमा अहिले पनि अनुपम खेर र सोनम कपुरको ‘ब्लु टिक’ कायमै छ । नेपालमा पनि प्रधानमन्त्री पुष्पकमल दाहाल ’प्रचण्ड’ को अकाउन्टको पनि चेकमार्क हटेको छ । प्रचण्डले प्रयोग गर्दै आएको पीएमओनेपाल एकाउन्टको चेकमार्क खोसिएको हो । त्यस्तै पूर्वप्रधानमन्त्री केपी शर्मा ओलीको अकाउन्टको पनि चेकमार्क हटेको छ ।
यसअघि नै लागु भइसकेको ब्लु चेकमार्क भेरिफिकेसनका लागि पैसा नतिर्ने सबैको चेकमार्क ट्विटरले खोसिदिएको हो । एलन मस्कले किनेपछि यसअघि नै ट्विटरले ब्लु चेकमार्कका लागि मासिक ८ डलर तिर्ने नियम ल्याएको थियो । तर लाखौँ प्रयोगकर्ताले ब्लुट टिकका लागि पैसा नतिरेपछि चेकमार्क हटाइदिएको हो ।
ट्विटरले पैसा नतिर्ने व्यक्ति, संस्थादेखि मिडिया कम्पनीहरुसमेतको ब्लु टिकमार्क हटाएको छ । ट्विटरले व्यवसायलाई सब्क्रिप्सनबिना गोल्डेन चेकमार्क दिने गरेको छ । सरकारी एकाउन्टलाई खैरो चेकमार्क दिने गरिएको छ ।
