९ वैशाख, काठमाण्डौ ।
दाइजोका लागि धनुषामा श्रीमतीलाई आगो लगाएर हत्या गर्ने प्रयास गरेको घटनामा श्रीमान पक्राउ परेका छन् । पीडित श्वेता झाले दिएको जाहेरीका आधारमा प्रहरीले जनकपुरधाम उपमहानगरपालिका– २०, देवपुरा रुपैठा निवासी उनका श्रीमान् राजीव झालाई नियन्त्रणमा लिएको हो ।
जिल्ला प्रहरी कार्यालय (धनुषा) का प्रहरी उपरीक्षक विश्वराज खड्काले पीडितले घरेलु हिंसा मुद्दामा उजुरी दिएको जानकारी दिए । नयाँ वर्षको दिन श्वेता झालाई श्रीमानसहित परिवारका अन्य सदस्यले दाइजोका लागि जलाएर हत्या गर्ने प्रयास गरेका थिए ।
बिहेका बेला दाइजोबापत माइतीले दिने भनेको सुन नदिएको भन्दै नयाँ वर्षका दिन आफूलाई पतिसहित उनको परिवारै मिलेर आगो लगाएर मार्न खोजेको श्वेतालाई बताएकी छन् । अहिले श्वेता जनकपुरधामस्थित प्रादेशिक अस्पतालमा उपचार गराइरहेकी छन् ।
श्वेताको घाँटीभन्दा तलको ३५ प्रतिशत भाग जलेको छ । राजिवको परिवारले आफूलाई मरणासन्न हुनेगरी कुटपिट गरेर शरीरमा आगो लगाएपनि यतिका दिनसम्म उपचारका लागि अस्पताल समेत नल्याएको उनले बताएकी छन् ।
घटनाबारे थाहा पाएपछि भारत विहारको दरभंगास्थित पोठिया माइती रहेकी श्वेताका बुबा जयकुमार झा, भाइलगायतका आफन्तले उनलाई अस्पतालमा भर्ना गराएका हुन् । विवाहको १० वर्ष भइसक्दा पनि ससुरालीले दिन्छु भनेको ३ तोला सुन नदिएको भन्दै आफूलाई श्रीमान्ले पहिलेदेखि यातना दिइरहेको आरोप श्वेताको छ ।
यसै क्रममा नयाँ वर्षका दिन छोरालाई पतिले पिट्न थालेपछि रोक्न खोज्दा श्रीमान्, ससुरा, देवरसमेत परिवारका सदस्य मिलेर आफ्नो शरीमा आगो लगाएको श्वेताको भनाइ छ ।
