१० वैशाख, काठमाण्डौ ।
त्रिभुवन अन्तर्राष्ट्रिय विमानस्थलको सञ्चार उपकरणमा समस्या आएसँगै उडान प्रभावित भएको छ । विमानस्थल कार्यालयका प्रवक्ता टेकनाथ सिटौलाका अनुसार विमानस्थल टावर र पाइलटबीचको सञ्चारमा समस्या देखिएसँगै आन्तरिक र अन्तर्राष्ट्रिय दुबैतर्फ एक घण्टादेखि उडान प्रभावित भएको हो।
अहिले आकाशमा भएका जहाजलाई अवतरण गराउने काम भएपनि उडानमा भने अनुमति नदिएको उनले बताएका छन् । ’जहाज अवतरणमा समस्या छैन। समस्या आउनुअघि नै उडिसकेका जहाजहरूलाई अवतरण गराइरहेका छौं,’ प्रवक्ता सिटौलाले भनेका छन्, ’उडान भने रोकिएको छ। ग्राउन्डमा भएका जहाजहरूलाई पनि रिलिज गरिएको छैन।’
साथै प्राविधिक टोलीले हाल समस्या समाधानको काम गरिरहेको प्रवक्ता सिटौलाले बताए। यसअघि पनि पटक पटक प्राविधिक कठिनाइका कारण त्रिभुवन विमानस्थलको उडान प्रभावित हुदै आएको छ। नेपालका सरकारी वेभसाइटहरु पटक पटक ह्याकरको हातमा पुगिसकेका छन् ।
गएको फागुनमा त्रिभुवन अन्तर्राष्ट्रिय विमानस्थल (टीआईए) को अध्यागमन विभागको प्रशासनिक सफ्टवेयर, सर्भर डाउन भएको थियो । विमानस्थलको अध्यागमन विभागमा सफ्टवेयरमा समस्या आउँदा अन्तर्राष्ट्रिय उडानहरू प्रभावित भएका थिए । माघ १५ गते समेत सबै सरकारी वेबसाइटहरू एकैपटक डाउन हुँदा विमानसेवा समेत प्रभावित भएको थियो ।
