८ असार,एजेन्सी ।
नेपालले आईसीसी एकदिवसीय विश्वकप क्रिकेट छनोटमा बिहीबार वेस्टइन्डिजसँग १०१ रनको फराकिलो हार बेहोरेको छ। आफ्ना ३ खेलमा २ हार र १ जित निकालेको नेपालसँग सुपर ६ मा पुग्ने एकमात्र सम्भावना बाँकी छ। शनिबार नेपालले समूह चरणको अन्तिम खेल नेदरल्यान्डस्सँग खेल्दैछ।
उक्त खेल जितेको अवस्थामा नेपाल सुपर ६ मा पुग्ने सम्भावना कायम रहनेछ। अहिले समूह ‘ए’ मा नेपाल २ अंकका साथ चौथो स्थानमा छ। २ खेलमा एक हार र एक जित निकालेको नेदरल्यान्डस् समान २ अंकका साथ नेट रनरेटका कारण नेपालभन्दा अगाडि छ। नेदरल्यान्डस्का लागि पनि नेपालसँगको खेल निर्णायक जस्तै छ।
किनभने यो खेलमा पराजित हुँदा उसको अन्तिम खेल वेस्टइन्डिजसँग बाँकी छ। समूह ‘ए’मा सवैभन्दा बलियो देखिएको वेस्टइन्डिजसँग जित निकाल्न उसलाई त्यति सजिलो हुनेछैन। नेपालसँग हारेर नेदरल्यान्डस्ले वेस्टइन्डिजसँग जितेको खण्डमा नेट रनरेटका आधारमा अघि रहेको टोली सुपर ६ मा पुग्नेछ।
नेदरल्यान्डस्लाई हराउँदा नेपालको रनरेट उकासिने सम्भावना देखिन्छ। समूह ‘ए’ मै रहेको अमेरिका ३ वटै खेलमा पराजय भोगेर समूह चरणबाटै बाहिरिने पहिलो टोली बनेको छ। समूह ‘ए’बाट जिम्बावे र वेस्टइन्डिज सुपर ६ मा पुग्ने तय नै छ। शुक्रबार समूह ‘बी’का खेल हुँदैछन्। समूह ‘बी’को शीर्षमा रहेको ओमानले दोस्रो नम्बरमा रहेको श्रीलंकाको सामना गर्दैछ।
एउटा खेल मात्रै खेलेको श्रीलंकाले जित निकालेर २ अंक बनाएको छ भने ओमानले २ खेल जितेर ४ अंक बनाएको छ। यसैगरी एउटा मात्रै खेल खेलेको स्कटल्यान्ड २ अंकका साथ तेस्रो नम्बरमा छ। जसले यो समूहको पुछारमा रहेको युएईसँग खेल्दैछ। दुई खेल खेलिसकेको युएईले दुवैमा पराजय भोगेको छ। यसैगरी यो समूहको आयरल्यान्ड पनि दुवै खेल हारेर चौथो नम्बरमा छ।
