१२ असार,एजेन्सी ।
भारतमा हुने आइसीसी एकदिवसीय विश्वकप २०२३ को फाइनल सेड्युल सार्वजनिक भएको छ । अक्टुबर ५ देखि सुरु हुने विश्वकपको उद्घाटन खेलमा इंग्ल्यान्ड र न्युजिल्यान्डबीच प्रतिस्पर्धा हुने भएको छ। आयोजक भारतले भने पहिलो खेल ८ अक्टुबरमा अस्ट्रेलियाविरुद्ध खेल्नेछ।
प्रतियोगिताको उद्घाटन खेल र फाइनल खेल भने अहमदाबादमा हुने भएको छ । विश्वकपको फाइनल खेल १९ नोभेम्बरमा हुनेछ । प्रतियोगिताभर कुल ४८ खेल भारतका एक दर्जन शहरमा हुनेछन् । जम्मा १० टिमले भाग लिने उक्त प्रतियोगिताका आठ टिम यसअघि नै तय भइसकेका छन् भने दुई टिमका लागि जिम्बाबेमा छनोट प्रतियोगिता जारी छ ।
छनोट प्रतियोगिताबाट विश्वकपमा २ टिम पुग्नेछन्। नेपाल भने समूह छनोट प्रतियोगिताको सुरुवाती चरणबाटै बाहिरिएको छ । समूह चरणबाटै बाहिरिएसँगै नेपालको २०२३ को विश्वकप खेल्ने सपनामा पूर्णविराम लागेको छ।
विश्वकपका लागि इङल्याण्ड, भारत, पाकिस्तान, बंगलादेश, दक्षिण अफ्रिका, अष्ट्रेलिया, न्यूजिल्याण्ड र अफगानिस्तान छनोट भइसकेका छन् । १९७५ देखि २०१९ सम्मको १२ वटा विश्वकप क्रिकेटमा अहिलेसम्म सबैभन्दा बढी अष्ट्रेलियाले ४ पटक उपाधि जितेको छ ।
२०२३ को विश्वकप आयोजक भारतले २ पटक विश्वकपको ट्रफी उचालेको छ भने वेस्टइन्डिजले समान दुई पटक विश्वकप जितेको छ । दुई पटकको विश्वविजेता वेस्टइन्डिज भने विश्वकपमा स्थान बनाउनका लागि विश्वकप छनोटमा अहिले संघर्ष गरिरहेको छ ।
अहिलेसम्मको सुपर ६ सम्मको नतिजाले वेस्टइन्डिजको विश्वकपमा स्थान बनाउने संभावना कम देखिन्छ । विश्वकप खेल्दै आएका पाकिस्तान, इङल्यान्ड र श्रीलंकाले भने अहिलेसम्म एक एक पटक मात्रै विश्वकपको ट्रफी उचालेका छन् । १९९६को विश्वकप विजेता श्रीलंका पनि अहिले भने विश्वकपमा स्थान बनाउनका लागि जिम्वाबेमा छनोट खेलिरहेको छ ।
