१४ असार, काठमाडौं ।
मंगलबार काठमाडौं आइपुगेका चिनियाँ अर्बपति ज्याक मा आज पाकिस्तान तर्फ लागेका छन् । त्रिभुवन अन्तर्राष्ट्रिय विमानस्थलबाट आज बिहान ११ः२५ बजेको फ्लाइटमा ज्याक मा पाकिस्तानको लाहौर प्रस्थान गरेका हुन् । उनी गत मंगलबार सिंगापुरबाट बंगलादेशको भीपीसीएमए विमान चार्टर गरेर नेपाल आएका थिए ।
ई कमर्स कम्पनी अलिबाबाका संस्थापक ज्याक नेपालमा रहँदा द्वारिकाज होटलमा बसेका थिए । उनले स्थापना गरेको अलिबाबाले नेपाली ई कमर्स कम्पनी दराजमा पनि लगानी गरेको छ । पर्यटक भिसामा आएका उनले बौद्धमा पुगेर हस्तकलाका सामाग्री किनेका थिए । बुधबार ज्याक कालीमाटीस्थित तरकारी बजारको अवलोकनमा पुगेका थिए ।
बुधबार बिहान १० बजेर ३७ मिनेटमा कालीमाटी बजार परिसर पुगेका ज्याक मा युनले त्यहाँ १३ मिनेट बिताएका थिए । ५ वटा कार र सुरक्षाका केही मोटरसाइकल सहित ज्याक मा युनको टोली कालीमाटी बजारमा १० बजेर ३७ मिनेटमा छिरेको थियो । बजार विकास समितिको अगाडि रहेको पार्किङमा केही गाडी रोकिएका थिए भने ज्याकमा सवार कार कृषक होल्डिङ यार्डमा पुगेको थियो ।
ज्याक मा बजारमा किन गएका थिए भन्नेबारे भने स्पष्ट खुलेको छैन । उनले बजारमा रहेका व्यवसायीसँग कुनै कुराकानी नगरेको पनि प्रत्यक्षदर्शीले बताए । यस्तै उनले भक्तपुर दरबार स्क्वायर र स्वयम्भूको भ्रमण गरेका थिए । उनी नेपाल आउनुको कारण भने खुलेका छैनन् ।
उनले प्रधानमन्त्री र अर्थमन्त्रीलाई पनि भेट्ने चर्चा रहेपनि भेटे नभेटेको बारे खुलेको छैन । चिनियाँ धनाढ्यको सूचीमा पाँचौ नम्बरमा रहेका उनी विश्वका डलर अर्बपतिहरुको सूचीमा ६३ औं स्थानमा छन् । फेब्र्सकाअनुसार ज्याक मा २३.५ बिलियन अमेरिकी डलरका धनी छन् ।
