२० असार, एजेन्सी ।
पोर्चुगिज सुपरस्टार क्रिस्टियानो रोनाल्डोलाई भित्र्याएर विश्व फुटबलमा आफ्नो स्थान जमाउँदै लगेको साउदी अरबको क्लब अल नासरले त्यसपछि पनि पश्चिमा नाम चलेका खेलाडीहरुलाई अनुबन्धित गर्ने काम जारी राखेको छ । यो क्रममा अल नासरले क्रोएसियाका मिडफिल्डर मार्सेलो ब्रोजोभिचलाई पनि अनुबन्ध गरेको छ ।
साउदी क्लबले १८ मिलियन युरो खर्चेर इटालियन क्लब इन्टर मिलानबाट ब्रोजोभिचलाई भित्र्याएको हो । स्पेनिस ला लिगा च्याम्पियन बार्सिलोनाले पनि ३० वर्षीय ब्रोजोभिचमाथि नजर राखेको थियो । तर क्याटलान क्लबले साउदी क्लबझैं ठूलो आर्थिक प्रस्ताव गर्न सकेन । ब्रोजोभिचले गत महिना म्यानचेस्टर सिटीविरुद्ध भएको च्याम्पियन्स लिगको फाइनलमा सुरुवात गरेका थिए ।
ब्रोजोभिच पछिल्लो ८ वर्षदेखि इटालीमा खेलिरहेका छन् । उनी सन् २०१५ मा डिनामो जाग्रेबबाट लोनमा इन्टर आएका थिए । त्यसपछि उनको बसाइ स्थायी भएको थियो । ब्रोजोभिचले इन्टर मिलानबाट २ पटक कोपा इटालिया र एकपटक इटालियन सिरी ए को उपाधि जिते । उनले ३ सय ३० खेलमा ३१ गोल गरेका छन् ।
ब्रोजोभिचले क्रोएसियाको अन्तर्राष्ट्रिय फुटबलको सफलतामा पनि महत्त्वपूर्ण भूमिका निर्वाह गरेका छन् । सन् २०१८ को रुस फिफा विश्वकपमा क्रोएसिया उपविजेता बन्दा र यसै वर्ष कतारमा तेस्रो हुँदा ब्रोजोभिच मिडफिल्डमा लगातार उपस्थित थिए । ब्रोजोभिचले अब अल नासरमा पोर्चुगिज सुपरस्टार क्रिस्टियानो रोनाल्डोसँग खेल्नेछन् ।यसबीच लिभरपुलका फरवार्ड रोबर्टो फिर्मिनो पनि साउदी प्रो लिग क्लब अल–अहलीमा आवद्ध भएका छन् ।
फिर्मिनो तीन वर्षका लागि साउदी पुगेका हुन् । गत सिजनको अन्त्यमा लिभरपुलसँग सम्झौता सकिएपछि ३१ वर्षीय ब्राजिलका फरवार्ड फ्रि एजेन्ट थिए । सन् २०१५ मा होफेनहाइमबाट लिभरपुल आएपछि फिर्मिनोले रेड्सका लागि ३६२ खेलमा १ सय ११ गोल गरेका थिए । युरोपबाट साउदी जाने खेलाडीको सूची दिन प्रतिदिन लम्बिँदै गइरहेको छ ।
यसअघि रियल म्याड्रिडबाट फरवार्ड करीम बेन्जेमा, वल्भ्सबाट मिडफिल्डर रुबेन नेभेस र चेल्सीका तीन खेलाडी कालिडू कौलीबाली, एनगोलो कान्टे र एडुआर्ड मेन्डीले साउदी लिगका क्लबसँग सम्झौता गरिसकेका छन् । पछिल्लो समय विश्वका चर्चित खेलाडीको साउदी आकर्षणले विश्वको शीर्ष पाँचमध्ये एक बन्ने साउदी प्रो लिगको महत्वकांक्षालाई टेवा पुगेको छ ।
