२० असार,एजेन्सी ।
विश्व चर्चित फुटबलर नेइमार जुनियरलाई ब्राजिलको स्थानीय प्रशासनले ३३ लाख अमेरिकी डलर जरिवाना तिराएको छ । घर छेउमा कृत्रिम ताल बनाएपछि प्रकृति र वातावरणको नियम तोडेको भन्दै उनलाई मंगारातिबाको नगरपालिकाले ठूलो रकम जरिवाना गराएको हो । मंगारातिबामा नेइमारले आलिसान घर बनाएका छन् ।
उनले घरछेउमै कृत्रिम ताल बनाएको थाहा पाएपछि वातावरणविद् र त्यहाँको स्थानीय प्रशासनले अनुगमन गरेका थिए । सो क्रममा नेइमारका पिता नेइमार सान्तोस सिनियरले उनीहरूलाई आक्रोशित भएर कराएका थिए । आफ्नो घरमा जे पनि बनाउन पाइने बताएता पनि नेइमारलाई जरिवाना तिराइयो ।
स्थानीय प्रशासनका अनुसार नेइमारले कृत्रिम ताल बनाउँदा स्थानीय अधिकारीहरूसँग कुनै समन्वय गरेका थिएनन्, जसले प्राकृतिक नियम उल्लंघन हुनपुग्यो । नेइमारले खोलाको बाटो मोडेर आफ्नो घर तिर लगेको, नदीको ढुंगा र बालुवा उत्खनन् गरेको साथै घर नजिकैको समुद्र तटबाट पनि अवैध उत्खनन् गरेको पाइएको थियो ।
जरिवाना गरिएता पनि यस विषयमा थप अनुसन्धान भइरहेको ब्राजिलियन प्रहरीले जनाएको छ । यो मुद्दाको छानबिन गर्न स्थानीय महान्यायाधिवक्ताको कार्यालय, प्रदेश प्रहरी र वातावरण संरक्षण कार्यालय लगायतका वातावरणीय नियन्त्रण निकायलाई जिम्मा दिइएको अन्तराष्ट्रिय संचारमाध्यामहरुले उल्लेख गरेका छन् ।
