२८ असार, एजेन्सी ।
यतिबेला सारा संसार चन्द्रमामा जान चाहन्छ । अमेरिकाले ५० वर्षअघि चन्द्रमामा मानिस पठाएको थियो । भारतले चन्द्रयान–३ मिसनमार्फत शुक्रबार आफ्नो रोभरलाई चन्द्रमामा पठाउदै छ । चन्द्र मिसनमा भारतले सफलता खोजिरहेका बेला चीन चन्द्रमामा मानिस पठाउने दोस्रो देश बन्ने अभियानमा जुटेको छ ।
चिनियाँ अधिकारीहरूले आफ्नो मानव चन्द्रमा मिसनसँग सम्बन्धित विवरणहरु सार्वजनिक गरेका छन्। चीनको मानव अन्तरिक्ष एजेन्सी (सीएमएसए) का उपप्रमुख इन्जिनियर झाङ हाइलियनले वुहानमा भएको एरोस्पेस शिखर सम्मेलनमा उक्त योजनाको खुलासा गरेका हुन्। हेलियनका अनुसार यो मिसन सन् २०३० भन्दा पहिले हुने अपेक्षा गरिएको छ ।
यो चन्द्रमामा अनुसन्धान केन्द्र स्थापना गर्ने परियोजनाको एक हिस्सा हो। झाङले चन्द्रमामा जाने अन्तरिक्ष यात्रीहरूले अनुसन्धान केन्द्र निर्माण गर्ने उत्तम तरिका पत्ता लगाउने बताएका छन् । ग्लोबल टाइम्सका अनुसार दुई प्रक्षेपण सवारी साधन, ल्यान्डर र मानवसहितको अन्तरिक्ष यानलाई चन्द्रमाको कक्षमा पठाइनेछ र तिनीहरू एक अर्कासँग जोडिनेछन्।
अन्तरिक्ष यानमा सवार चिनियाँ अन्तरिक्ष यात्रीहरू ल्यान्डरमा प्रवेश गर्नेछन् जुन चन्द्रमाको सतहमा अवतरण हुनेछ। रिपोर्टका अनुसार चन्द्रमामा रहँदा उनीहरूले नमूना सङ्कलन गर्ने र धेरै वैज्ञानिक अनुसन्धान गर्ने छन्। यहाँबाट पछि तिनीहरू फेरि ल्यान्डरमा जानेछन् जसले फेरि उडान गर्नेछ र अन्तरिक्ष यानसँग जोड्नेछ र तिनीहरूलाई पृथ्वीमा फिर्ता ल्याउनेछ।
चिनियाँ वैज्ञानिकहरू अहिले मिसनसँग सम्बन्धित तयारी गरिरहेका छन्। उनीहरु मुनसुट, म्यान्ड लुनार रोभर, मानव अन्तरिक्ष यान र मुन ल्यान्डरलगायत सबै उपकरणहरू विकास गर्न व्यस्त छन्। यद्यपि सरकारी सञ्चारमाध्यमले कति अन्तरिक्ष यात्री चन्द्रमामा जानेछन् भन्ने खुलाएका छैनन् ।
चीनले आफ्नो अन्तरिक्ष कार्यक्रमलाई द्रुत गतिमा बढाइरहेको छ र चन्द्र मिशन यसमा सबैभन्दा नयाँ हो। चीन अन्तरिक्ष दौडमा ढिलो प्रवेश गरेको छ, तर छिटो गति लिइसकेको छ। सन् १९७० सम्म चीनले आफ्नो एउटा पनि उपग्रह प्रक्षेपण गरेको थिएन । तर अहिले अमेरिकाले आफ्ना अन्तरिक्ष यात्रीहरूलाई चन्द्रमामा पठाइसकेको छ ।
चीनले सन् २०१३ मा चन्द्रमामा रोभर सफलतापूर्वक अवतरण गरेको थियो। यो सफलता पाउने चीन तेस्रो देश मात्र बनेको छ। त्यसपछि सी जिनपिङले अन्तरिक्षको सपना चीनलाई बलियो बनाउने एउटा महत्वपूर्ण हिस्सा भएको बताएका थिए । त्यसयता चीनले अन्तरिक्ष मिसनमा द्रूत गतिमा उपलब्धिहरु हासिल गरिरहेको छ ।
