१८ साउन,एजेन्सी ।
अर्जेन्टिनी कप्तान लियोनल मेसीले गोलको लयलाई कायम राखेपछि अमेरिकी मेजर लिग सकर (एमएलएस) क्लब इन्टर मियामीले लिग्स कपमा ओर्लान्डो सिटीविरुद्ध ३–१ को जित निकालेको छ । मेसीले लगातार तीन खेलमा गोल गर्दा मियामीले तीनै खेल जितेको हो । यससंगै मियामी लिग्स कप २०२३ को अन्तिम १६ मा प्रवेश गरेको छ ।
बिहीबार मियामीको जितमा मेसीले दुई र जोसेफ मार्टिनेजले एक गोल गरे । ओर्लान्डोका सेर अराउहोले एक गोल फर्काएका थिए । खेलको सातौैँ मिनेटमा मेसीले गरेको गोलबाट मियामीले अग्रता बनाएको थियो । १७औँ मिनेटमा अराउहोले गरेको गोलबाट ओर्लान्डो खेलमा फर्किएको थियो ।
५१औँ मिनेटमा मार्टिनेजले पेनाल्टीमार्फत गोल गर्दै मियामीलाई पुनः अग्रता दिलाएका थिए । ७२औँ मिनेटमा मेसीले व्यक्तिगत दोस्रो गोल गर्दै मियामीलाई ३–१ को अग्रता दिलाए । यसपछि दुवै टिमबाट थप गोल भएन । ओर्लान्डोविरुद्ध बार्सिलोनाका पूर्वरक्षक जोर्डी अल्बाले मियामीबाट ‘डेब्यु’ गरेका थिए ।
मियामीले अब अन्तिम–१६ मा एफसी डालासविरुद्ध खेल्नेछ । डालासले मेक्सिकोको माजात्लानलाई २–१ ले हराउँदै अन्तिम १६ मा स्थान पक्का गरेको हो । मेसीले इन्टर मियामीबाट तीन खेल खेल्दा पाँच गोल गरिसकेका छन् । उनले मियामीबाट डेब्युमै एक र दोस्रो खेलमा दुई गोल गरेका थिए ।
