२० साउन, काठमाण्डौ ।
नेकपा माओवादी केन्द्रका उपमहासचिव वर्षमान पुनले करिब एक क्विन्टल सुन बरामद भएको प्रकरणमा आफू दोषी प्रमाणित भए कानुनी कठघरामा उभिन तयार रहेको बताएका छन् । शनिबार केन्द्रीय समिति बैठकमा धारणा राख्दै पुनले सुन प्रकरणमा छानबिन प्रक्रिया अगाडी बढाउन पनि आग्रह गरे।
सुन प्रकरणमा पक्राउ परेका दावा छिरिङसँग पुनको तस्बिरहरू सार्वजनिक भएका छन् । बैठकमा केन्द्रीय सदस्यहरूले सुन काण्डमा मुछिएका नेताहरूले मिडियामा विज्ञप्ति जारी गरेर नहुने भन्दै सीआईबीमा निवेदन दिनुपर्ने धारणा राखेका थिए ।
त्यसबारे जवाफ दिँदै पुनले दोषी प्रमाणित भए कानुनी कठघरामा उभिन तयार रहेको बताएका थिए । यसअघि गृहमन्त्री नारायणकाजी श्रेष्ठले सुन तस्करी प्रकरणमा माओवादीकै नेता भएपनि नछोड्ने चेतावनी दिएका थिए ।
पार्टीको जारी केन्द्रीय समिति बैठकमा बोल्दै उपप्रधानमन्त्री समेत रहेका श्रेष्ठले सुन तस्करी प्रकरणमा सरकारले गरिरहेको अनुसन्धान नरोकिने भन्दै यदि प्रमाण भेटिए पार्टीका नेता समेत कारबाहीमा पर्ने बताएका हुन् ।
पुनसंगै माओवादीका नेताहरु कृष्णबहादुर महरा, उनका छोरा, नन्दबहादुर पुन लगायतको पनि नाम जोडिएको छ । यसअघि बैठकमा उपाध्यक्ष एवं प्रवक्ता कृष्णबहादुर महराले पनि सुन तस्करीमा आफ्नो कुनै संलग्नता नभएको दाबी गरेका थिए ।
साथै उनले सुन तस्करी प्रकरण अनुसन्धानमा आफूले पनि सघाउने वचन दिएका छन् । नेताहरुले यसरी छानविनमा सहयोग गर्छु भनिरहँदा पनि अहिलेसम्म उनीहरुलाई सोधपुछसम्म भएको छैन । विहीबार प्रधानमन्त्री तथा मन्त्रिपरिषद्को कार्यालयमा भएको उच्चस्तरीय छलफलपछि सुन तस्करी प्रकरणको अनुसन्धानको नेतृत्व अब सीआईबीले पाएको छ।
गत साउन ३ गते हङकङ हुँदै त्रिभुवन विमानस्थल भन्सार छलेर भित्र्याइएको १०० किलो सुन राजस्व अनुसन्धानले बरामद गरेर अनुसन्धान अघि बढाइरहेको अवस्थामा अब त्यसको नेतृत्वको सीआईबीको हातमा जाने भएको हो ।
