२५ साउन,एजेन्सी ।
अमेरिकाको हवाई स्थित माउई काउन्टीको लाहाइना जंगलमा लागेको भीषण आगलागीमा परी कम्तीमा ३६ जनाको मृत्यु भएको छ । माउ काउन्टीले बुधबार साँझ आफ्नो वेबसाइटमा जारी एक विज्ञप्तिमा यो जानकारी दिएको हो। विज्ञप्तिमा भनिएको छ, दक्षिणबाट आएको डोरा आँधीका कारण वनमा लागेको आगोले कैयौं गाडी जलेका छन् भने कैयौं ऐतिहासिक भवनहरु खरानीमा परिणत भएका छन् ।
रातभरि आगोको ज्वाला बढिरहँदा बालबालिका र वयस्कहरूलाई आफ्नो ज्यान जोगाउन समुद्रमा डुब्न बाध्य पारेको अन्तराष्ट्रिय संचारमाध्यामहरुले जनाएका छन् । यसअघि अधिकारीहरूले आगलागीका कारण २७१ संरचनामा क्षति पुगेको र दर्जनौं घाइते भएको बताएका थिए ।
अमेरिकी राष्ट्रपति जो बाइडेनले हवाईको माउ टापुमा लागेको डढेलो नियन्त्रण गर्न सबै उपलब्ध संघीय स्रोतहरू’ प्रयोग गर्न आदेश दिएको बताएका छन्। राष्ट्रपतिले उद्धार कार्यमा तटरक्षक र नौसेनाले पनि सहयोग गरिरहेको बताएका छन् ।
आगो निभाउनका लागि नौसेनाले ब्ल्याक हक हेलिकप्टर उपलब्ध गराएको छ भने हवाई नेशनल गार्डले आगो निभाउन र खोजी तथा उद्धार कार्यका लागि चिनूक हेलिकप्टर तैनाथ गरेको छ।
बाइडेनले भनेका छन् कि यातायात विभागले टापुमा फसेका पर्यटकहरूलाई बाहिर निकाल्न विभिन्न व्यवसायिक एयरलाइन्ससँग काम गरिरहेको छ। उही समयमा, गृह र कृषि विभागहरू आगो निभेपछि राहत कार्यमा सहयोग गर्न तयार रहेको उनले बताएका छन् ।
एक विज्ञप्तिमार्फत राष्ट्रपतिले “प्रियजनहरू गुमाएका परिवारहरूप्रति समवेदना व्यक्त गरेका छन् । उनले “यो खतरासँग लड्न जारी राख्ने साहसी अग्नि नियन्त्रकहरू र उद्धारकर्ताहरूप्रति कृतज्ञता व्यक्त गरेका छन् ।
माउ काउन्टीले लहैना, पुलेहु र दुर्गम क्षेत्रमा आगो नियन्त्रणमा लिने प्रयास भइरहेको जनाएको छ । काउन्टीले २१ सय भन्दा बढी मानिसहरूलाई रातभर चार आपतकालीन आश्रयहरूमा राखिएको र अन्य २ हजार यात्रुहरूलाई काहुलुई एयरपोर्टमा राखिएको बताएको छ ।
