२६ साउन,एजेन्सी ।
साविक उपविजेता नेदरल्यान्ड्सविरुद्ध २–१ को जित निकाल्दै फिफा महिला विश्वकपमा स्पेनले पहिलोपटक सेमिफाइनलमा स्थान बनाएको छ । शुक्रबार न्युजिल्यान्डस्थित वेलिङ्टन क्षेत्रीय रंगशालामा भएको खेलमा साविक उपविजेताविरुद्ध जित दिलाउन स्पेनकी मारियोना काल्डेन्टी र साल्मा केलस्टे पारयुलो आइनगोनोले गोल गरे ।
नेदरल्यान्ड्सकी स्टेफानी भार डेर ग्राटले एक गोल फर्काएकी थिइन् । पहिलो हाफमा नेदरल्यान्ड्सलाई गोलरहित बराबरीमा रोकेको स्पेनले ८१औँ मिनेटमा काल्डेन्टीको गोलबाट अग्रता बनाएको थियो । तर, इन्जुरी समयमा ग्राटले गोल फर्काउँदै नेदरल्यान्ड्सलाई बराबरीमा ल्याइन् ।
यसपछि इन्जुरी समयमा गोल हुन नसक्दा खेल अतिरिक्त समयमा धकेलिएको थियो । स्पेनकी पारयुलो आइनगोनोले १११औँ मिनेटमा गरेको गोल निर्णायक बनेपछि स्पेनले पहिलोपटक महिला विश्वकपको सेमिफाइनल यात्रा तय गरेको हो ।
सन् २०१५ को संस्करणदेखि विश्वकपमा ‘डेब्यू’ गरेको स्पेन गत संस्करणमा भने प्रि–क्वार्टरफाइनलबाट बाहिरिएको थियो । र, यो नै यसअघि स्पेनले विश्वकपमा हासिल गरेको उत्कृष्ट नतिजा थियो ।
स्पेन समूह ‘सी’को उपविजेताका रूपमा अन्तिम–१६ मा प्रवेश गरेको थियो । क्वार्टरफाइनलमा स्थान बनाउने क्रममा स्पेनले स्विट्जरल्यान्डलाई ५–१ ले हरायो। अब फाइलन प्रवेशका लागि स्पेनले जापान र स्विडेनबीचको विजेतासँग प्रतिस्पर्धा गर्नेछ ।
