२७ साउन,एजेन्सी ।
एसिया कप क्रिकेट सुरु हुन अब १८ दिन बाँकी छ । प्रतियोगिताको पहिलो खेल नै नेपालले आयोजक राष्ट्र पाकिस्तानविरुद्ध खेल्दैछ । आयोजनास्थललाई लिएर लामो समय खिचातानीपछि एसिया कप पाकिस्तान र श्रीलंकामा हुने टुंगो लागेको छ । अगष्ट ३० मा पाकिस्तानमा हुने उद्घाटन खेलमा नेपालले घरेलु टोलीको सामना गर्नुपर्नेछ ।
पाकिस्तान क्रिकेटको पावर हाउस राष्ट्र हो । एक दिवसीय र टी–२० विश्वकपसमेत जितिसकेको पाकिस्तान एसिया कपका दुईवटा संस्करणमा च्याम्पियन भएको छ । सन् २००० र सन् २०१२ को एसिया कपमा पाकिस्तानले उपाधि जितेको थियो । अहिले पनि पाकिस्तान एसिया कपको एक दावेदार हो । यता, नेपाल भने पहिलोपटक यो प्रतियोगिता खेल्दैछ ।
यसअघि एकपटक नेपाल एसिया कपका लागि छनोट भएर पनि खेल्न पाएको थिएन । यसपालिको एसिया कपमा नेपालको समूहमा पाकिस्तानसँगै भारत पनि छ । पाकिस्तानसँग नेपालको खेल मुल्तानमा हुनेछ भने भारतसँगको खेल सेप्टेम्बर ४ मा श्रीलंकाको केन्डीमा हुनेछ । उद्घाटन खेल खेल्ने नेपालले त्यसको तयारीका लागि पाकिस्तानमा एक हप्ता अभ्यास गर्ने भएको छ ।
नेपालले तयारीका लागि पाकिस्तानी क्रिकेट बोर्डसम्म समय मागेको थियो । पाकिस्तानी क्रिकेट बोर्डले अभ्यासका लागि नेपाल क्रिकेट संघ (क्यान) ले मागेको समय उपलब्ध गराएको छ । नेपाल अभ्यासका लागि २२ अगस्टमा कराँची पुग्ने छ । कराँचीमा अभ्यास गरेपछि नेपाली टिम २७ अगस्टमा कराँचीबाट मुल्तान जानेछ ।
नेपालले क्रिकेटको पावर हाउससंग भिड्दा पाकिस्तानका खेलाडि कस्ता छन् ?
बाबर आजम = पाकिस्तानी कप्तान बाबर पछिल्लो समय विश्व क्रिकेटकै प्रतिभाशाली खेलाडी हुन । विपक्षी टोलीका लागि उनी सधैँ घातक बन्छन । उनको कप्तानीमा पाकिस्तानले धेरै उपलब्धि हासिल गरेको छ । एकदिवसीयमा उनले फरक प्रभाव राखेका छन । २०१५ बाट एकदिवसीय क्रिकेट सुरु गरेका बाबरले सय खेल संख्या पार गरिसकेका छन । अहिले पाकिस्तानी खेलाडीमध्ये सर्वाधिक रन बनाउने उनी एक्ला खेलाडी हुन । ९८ इनिङ्स खेलेका २८ वर्षीय बाबरले पाँच हजार ८९ रन जोडेका छन । दायाँहाते अग्रपंक्तिका ब्याट्सम्यान बाबरको उच्च स्कोर १५८ रन हो ।
इमान उल हक = २७ वर्षीय अनुभवी ओपनर इमान उल हक पाकिस्तानका अर्का प्रतिभावान खेलाडी हुन । २०१७ डेब्यु गरेका उनले ५९ खेलमा दुई हजार सात सय १९ रन बनाएका छन । करिअरमै उनले सर्वाधिक १५१ रन प्रहार गरेका छन । उनको औसत रन ५१.३० छ । बायाँहाते ब्याट्सम्यानले श्रीलंकाविरुद्ध आबुधाबीमा डेब्यु गरेका हुन । इमाम उल हकसँग दबाबबीच पनि लामो इनिङ खेल्ने क्षमता छ । त्यसले पनि उनी सधैँ ओपनरकै रूपमा मैदानमा उत्रन्छन ।
मोहम्मद रिजवान= विकेटकिपर तथा ब्याट्सम्यान मोहम्मदको आफ्नै विशेषता छ । ३१ वर्षीय टप अर्डरका ब्याट्सम्यान उनी पार्टटाइम स्पिनर पनि हुन । २०१५ यता एकदिवसीय क्रिकेट खेल्दै आएका रिजवानले ५७ खेलमा एक हजार चार सय आठ रन बनाएका छन । दायाँहाते ब्याट्सम्यानले सर्वाधिक ११५ रन बनाएका छन । ५० ओभरको खेलमा उनले दुई शतक र ९ अर्धशतक बनाएका छन् । पछिल्लो समय रिजवान विश्व क्रिकेटका उत्कृष्ट विकेटकिपर र ब्याट्सम्यान मानिन्छन ।
साहिन साह अफ्रिदी=
२०२१ को आइसिसी टी–२० विश्वकपपछि अफ्रिदीको चर्चा ह्वात्तै बढ्यो । भारतविरुद्धको खेलले उनलाई विश्वले चिन्ने अवसर पायो । भारतविरुद्ध १० विकेटको सानदार जितमा उनले तीन विकेट लिएका थिए । उनकै प्रदर्शनमा पाकिस्तानले पहिलोपटक टी–२० विश्वकपमा भारतलाई हरायो । २३ वर्षीय बायाँहाते तीव्रगतिका बलर अफ्रिदीले पाकिस्तानका लागि ३६ एकदिवसीय खेल खेलेका छन । उनले ७० विकेट लिएका छन । ६.६ फिट अग्ला फास्ट बलर अफ्रिदीको उत्कृष्ट प्रदर्शन ६÷३५ हो । पछिल्लो समय उनले पाकिस्तानी घरेलु प्रतियोगिता र सिनियर टोलीमा कीर्तिमान बनाएका छन ।
नसिम साह=अफ्रिदीपछि पाकिस्तानी टोली बलिङतर्फ नसिम साहमा निर्भर छ । २० वर्षीय दायाँहाते तीव्रगतिका बलर साहले आफूलाई अन्तर्राष्ट्रिय खेलमा प्रमाणित गरिसकेका छन् । लिस्ट ए क्रिकेटमा उनले १५ वर्षमै डेब्यु गरेका थिए । उनले सन् २०२२ मा नेदरल्यान्डस्विरुद्ध एकदिवसीय खेलमा डेब्यु गरेका थिए । टेस्ट क्रिकेटमा उनले बंगलादेशविरुद्ध ह्याट्रिक विकेटको प्रदर्शन राखेका छन । एकदिवसीय क्रिकेटमा आठ खेल खेल्दा उनले २३ विकेट लिएका छन । उनको उत्कृष्ट प्रदर्शन ५÷३३ हो ।
पकिस्तानी टोलीका अन्य खेलाडीहरुमा सदाब खान, अब्दुल्लाह सफिक, फहिम अस्राफ, फकार जमान, हरिस रार्फ, इफ्तिकार अहमद, मोहम्मद हरिस, मोहम्मद नवाज, मोहम्मद वासिम (जुनियर), सलमान अली अगाह, साउद सकिल, तयाब ताहिर र उस्मा मिर रहेका छन् ।यसैबीच नेपाली क्रिकेट टोलीका स्पिनर सन्दीप लामिछानेले एसिया कपमा नेपालले भारत र पाकिस्तानविरुद्ध एकदमै राम्रो गर्ने बताएका छन् ।
ग्लोबल टि२० क्यानडामा सानदार प्रदर्शन गरेर स्वदेश फर्किएपछि सन्दीपले उक्त प्रतिक्रिया दिएका हुन् । सन्दीपले भारत र पाकिस्तानसँग खेल्दा दबाब नभएर ठूलो अवसर भएको बताउँछन् । सन्दीपले इन्डियन प्रिमियर लिग देखी बिग ब्यास लिगसम्म खेलेका छन् । सन्दीपसँग बाबर आजम, विराट कोहली जस्ता विश्वस्तरिय ब्याटरविरुद्ध खेलेको अनुभव छ । तर अन्य नेपाली खेलाडीमा त्यो अनुभव छैन । सन्दीप अन्य खेलाडीहरुले आफूलाई विश्वास गर्नुपर्ने बताउँछन् ।
