९ भदौ,एजेन्सी ।
इङ्ग्लिस प्रिमियर लिग फुटबलमा आज ६ वटा खेल हुँदैछन् । आजको पहिलो खेलमा नेपाली समय अनुसार बेलुका सवा ५ बजे बर्नमाउथ र टोटनहमबीच खेल हुनेछ । त्यस्तै, बेलुका पौने ८ बजे चार वटा खेल हुँदैछन् । यी खेलमा ब्रेन्टफोर्ड र क्रिस्टल प्यालेस, आर्सनल र फुलहम, म्यानचेस्टर युनाइटेड र नटिङ्घम फरेस्ट तथा एभर्टन र उल्भ्सबीच प्रतिस्पर्धा हुनेछ ।
त्यस्तै, राति सवा १० बजे ब्राइटन र वेस्टह्यामबीच खेल हुनेछ । प्रिमियर लिगमा गएराति भएको खेलमा चेल्सीले लुटन टाउनलाई हरायो । चेल्सीसँग लुटन टाउन ३–० गोलले पराजित भयो । चेल्सीका फरवार्ड रहिम स्टर्लिङले दुई तथा निकोलस ज्याक्सनले एक गोल गरे । यो चेल्सीको यस सिजनको पहिलो जित हो ।
चेल्सीले गत दुई खेलमा एकमा हार र एक खेलमा बराबरी गरेको थियो । यस जित संगै चेल्सीको चार अंक पुगेको छ । लुटनको भने दुई खेलमा कुनै पनि अंक रहेको छैन । यता इंग्लिस युवा मिडफिल्डर जुड बेलिङहमको निर्णायक गोलमा रियल म्याड्रिडले स्पेनिस ला लिगामा लगातार तेस्रो जित निकालेको छ ।
रियलले सेल्टा भिगोमाथि उसकै मैदानमा १–० को जित निकालेको हो । रियलको जितमा २० वर्षीय बेलिङहमले गरेको गोल नै निर्णयक बन्यो । उनले ८१औं मिनेटमा गोल गर्न सफल भएका थिए । यससँगै बेलिङहम ला लिगाको सुरुवाती तीन खेलमै गोल गर्ने खेलाडी बनेका छन् । यसअघि क्रिष्टियानो रोनाल्डोले लगातार सुरुवाती तीन खेलमै गोल गर्न सफल भएका थिए ।
यसै समरमा रियल आएका उनले तीन खेल ४ गोल र १ असिस्ट प्रदान गरेका छन् । रियलको यो लगातार तेस्रो जित हो । यसअघि रियलले एथलेटिको बिल्वाओ र अल्मेरियालाई पराजित गरेको थियो । लगातार तेस्रो जितसँगै शीर्षस्थानमा रहेको रियलको ३ खेलबाट ९ अंक पुगेको छ । पराजित सेल्टा ३ खेलबाट १ अंक जोडेर १६औं स्थानमा छ ।
