१४ मंसिर,एजेन्सी ।
चीनमा साना बालबालिकाहरूलाई सैन्य प्रशिक्षण दिन थालिएको छ । अन्तर्राष्ट्रिय संचारमाध्यमका अनुसार चीनले ७ वर्षभन्दा साना खेलाडीहरूलाई सैन्य प्रशिक्षण दिन थालेको हो । सांघाई स्पोर्ट्स ब्युरोका साना खेलाडीहरूलाई एक हप्ताका लागि सैन्य प्रशिक्षण दिन थालिएको हिन्दुस्तान टाइम्सले जनाएको छ ।
यसअघि चीनका साना उमेरका फुटबल खेलाडीहरूलाई पनि सैन्य प्रशिक्षण दिइएको थियो । सांघाई स्पोर्ट्स ब्युरोका अनुसार बालबालिकालाई सैन्य प्रशिक्षण दिइँदा उनीहरूमा जुझारु भावना उत्पन्न हुन्छ र देशप्रेम पनि बढ्छ । यस्ता प्रशिक्षणले चिनियाँ बालबालिकाले अनुशासन सिक्ने र समूहमा काम गर्न सिक्ने पनि बताइएको छ ।
यस हप्ताको सोमबारबाट सुरु भएको यस सैन्य प्रशिक्षणमा बालबालिकाले सैन्य पोशाक पनि लगाएका छन् । तर, यसरी सानै उमेरमा बालबालिकालाई सैन्य प्रशिक्षण दिनाले चीनले भविष्यमा हुने युद्धका लागि अहिलेबाटै सैनिक तयार गर्न थालेको पनि विश्लेषण हुन थालेको छ ।
गत महिनाबाट मात्र चीनमा एउटा कानुन लागू भएको छ, उक्त कानुनअनुसार विद्यालय र कजेलका पुस्तकहरूमा देशभक्ति र देशप्रेमबारे पाठहरू समावेश छन् । उक्त कानुनको उद्देश्य नै देशभक्ति र देशप्रेमको भावना पैदा गर्नु हो । यही कानुनअनुसार चीनमा बालबालिकाहरूलाई सैन्य प्रशिक्षण दिएको पनि अनुमान छ ।
यसअघि युक्रेनमा आक्रमण गरिरहेको रुसका बालबालिकालाई पनि सैन्य प्रशिक्षण दिइएको थियो । सार्वजनिक भएका भिडियोहरूमा रुसी बालबालिकाहरूले बन्दुक चलाएको पनि देख्न सकिन्छ । विद्यालयमा समेत रुसले सैन्य अध्ययनलाई पाठ्यक्रममा समावेश गरेको छ ।
चीन अहिले विश्वमै सबैभन्दा बढी सेना भएको देशमा पर्दछ । पछिल्लो तथ्याङ अनुशार चीनमा २१ लाख ८५ हजार सेना अहिले सक्रिय रहेका छन् भने ११ लाख ७० हजार रिर्जभ रहेका छन् । चीन कुनैपनि समय ताइवानलाई कब्जा गर्ने रणनीतिमा लागेको छ ।
