२९ मंसिर,एजेन्सी ।
भारतीय क्रिकेट कन्ट्रोल बोर्ड (बीसीसीआई) ले भारतीय क्रिकेट खेलाडीका लागि दुई वटा नम्बरका जर्सीलाई ‘रिटायर’ घोषणा गरेको छ । यसअघि नै बीसीसीआईले जर्सी नम्बर १० कसैले पनि प्रयोग गर्न नपाउने गरी ‘रिटायर’ घोषित गरिसकेको थियो । हालै यो सूचीमा जर्सी नम्बर ७ पनि थपिएको हो ।
भारतीय क्रिकेटलाई विश्वकपको उपाधिसहित ब्यवसायिक खेल आइपिएलमा आफ्नो टिम चेन्नईलाई सर्वाधिक उपाधि जिताउन सफल भएका भारतीय त्रिकेट टिमका सफल कप्तान महेन्द्र सिंह धोनीले लगाउने ७ नम्बरको जर्सी अब कसैले पनि प्रयोग गर्न नपाउने भएका छन् ।
क्याप्टेन कुलको उपमा पाएका धोनीको सम्मानमा भारतीय क्रिकेट कन्ट्रोल बोर्ड (बीसीसीआई) ले यस्तो निर्णय गरेको भारतीय संचारमाध्यामहरुले जनाएका छन् । जर्सी नम्बर १० सचिन तेन्दुलकरले प्रयोग गर्दथे । अन्तर्राष्ट्रिय क्रिकेटबाट उनले सन्न्यास लिएसँगै उनले प्रयोग गर्दै आएको जर्सी नम्बर १० प्रयोग गर्न बीसीसीआईले अन्य खेलाडीका लागि बन्देज लगाएको थियो ।
जर्सी नम्बर ७ भने भारतीय क्रिकेट टिमका पूर्व कप्तान महेन्द्र सिंह धोनीले लगाउँथे । उनले पनि अन्तर्राष्ट्रिय क्रिकेटबाट सन्न्यास लिइसकेका छन् । धोनीको योगदानलाई कदर गर्दै बीसीसीआईले उनको जर्सी नम्बर अब अन्य खेलाडीलाई नदिने घोषणा गरेको हो । धोनीले आफ्ना लागि जर्सी नम्बर ७ रोज्नुका पछाडि विभिन्न कारणहरु रहेको बताइन्छ ।
धोनीको जन्म जुलाई ७ मा भएको थियो। यो पनि भनिएको छ कि धोनीले म्यानचेस्टर युनाइटेड लेजेन्ड डेभिड बेकह्यामलाई माया गर्ने कारणले नम्बर ७ राख्ने निर्णय गरेका थिए । धोनीलाई नम्बर ७ यति धेरै मनपर्छ कि उनको ‘सेभेन’ नामको कम्पनी पनि रहेको छ । भारतीय क्रिकेट टिममा डेब्यु गर्ने कुनै पनि खेलाडीलाई उनीहरुको रोजाइका आधारमा जर्सी नम्बर उपलब्ध गराउने परम्परा छ ।
तर अब त्यस्ता खेलाडीलाई जर्सी नम्बर १० र जर्सी नम्बर ७ बाहेक उपलब्ध अन्य नम्बरमध्येबाट मात्रै एक नम्बर रोज्न लगाइने छ । अहिले भारतका चर्चित क्रिकेटहरु कप्तान रोहित शर्मा ४५ नम्बरको जर्सीमा खेल्दै आएका छन् भने पूर्व कप्तान विराट कोहली १८ नम्बर जर्सीमा खेल्दै आएका छन् ।
यसअघिका चर्चित क्रिकेटर तथा अहिलेका प्रमुख प्रशिक्षक राहुल द्रविडले १९ नम्बर जर्सीमा खेलेका थिए भने सौरव गांगुलीले ९९ नम्बर जर्सीमा खेलेका थिए ।
