८ पुष,विराटनगर ।
प्राज्ञिक विद्यार्थी परिषद् नेपालले कोशी प्रदेशसहित देशभर एकैसाथ शैक्षिक सर्वेक्षण सुरु गरेको छ । देशका ७७ वटै जिल्लामा आफ्नो सङ्गठनिक कार्य अगाडि बढाउदै आएको परिषद्ले आइतबार कोशी प्रदेशको राजधानी विराटनगरस्थित महेन्द्र मोरङ आदर्श बहुमुखी क्याम्पस र पूर्वाञ्चल विश्वविद्यालय स्कुल अफ म्यानेजमेन्टका विद्यार्थी तथा प्राध्यापकलाई सर्वेक्षण फारम भराएको छ ।
शिक्षा क्षेत्रको समग्र सुधार गर्ने उद्देश्यका साथ सुरु गरिएको सर्वेक्षणमा १४ वटा प्रश्न समावेश गरिएको परिषद्का राष्ट्रिय सचिव विवश कटुवालले जानकारी दिए । प्रश्नावलीमा उच्च शिक्षामा विद्यार्थी घट्दै जानु, शिक्षाको गुणस्तर, राजनीतिक हस्तक्षेपलगायतका विषय समावेश गरिएको परिषद्ले जनाएको छ ।
सर्वेक्षण अभियान पौष १५ गतेसम्म संचालन हुने कटुवालले जानकारी दिएका छन् । सङ्गठनले विभिन्न क्याम्पसमा ईकाइ गठन गरी विभिन्न शैक्षिक तथा सामाजिक कार्यक्रम गर्दै आइरहेको छ। परिषद्ले सात वटै प्रदेशमा अधिबेशन समेत सम्पन्न गरिसकेको छ ।
परिषद्का सदस्यहरुले सरसफाइ, ब्यक्तित्व विकास कार्यक्रम, कम्प्युटर प्रशिक्षण, सडक नाटक, रक्तदान, शैक्षिक गोष्ठी, जनचेतनामुलक र्यालीका साथै विभिन्न सामाजिक कार्यक्रमहरुमा स्वयंसेवकको भुमिका समेत निर्बाह गर्दै आएका छन् । शैक्षिक क्षेत्रलाई राजनीति मुक्त क्षेत्र वनाई शिक्षाको गुणस्तर वृद्धि गर्ने उद्धेश्यसहित २०५२सालमा स्थापना भएको परिषद्मा अहिले ४० हजार सदस्य रहेका छन् ।
