२९ पुष,एजेन्सी ।
हमासद्वारा सञ्चालित गाजाको स्वास्थ्य मन्त्रालयका अधिकारीहरूका अनुसार पछिल्लो २४ घण्टामा इजरायली आक्रमणमा १३५ जनाको मृत्यु भएको छ । मारिनेहरूमा गाजाको दक्षिणी क्षेत्र रफाहको एकै घरका १० जना पनि छन्, जहाँ दुई विस्थापित परिवारले शरण लिएका थिए ।
इजरायली बमबारीबाट विस्थापित भएका गाजाका अन्य क्षेत्रबाट रफाहमा आएकाहरू कारण यस शहरको जनसंख्या १० लाखभन्दा बढी पुगेको छ । यसैबीच गाजाबाट पनि दक्षिणी इजरायलमा रकेट प्रहार गरिएको छ । रफाह निवासी समीर केष्टाले इजरायली बमबारीमा आफ्नो घर पूर्ण रूपमा ध्वस्त भएको बताएका छन् ।
आक्रमणको समयमा उनी र उनकी श्रीमती बाहिर गएका थिए । इजरायलले हमासका सदस्य र तीनका पूर्वाधारलाई निशाना बनाएको बताएको छ । इजरायल–हमास युद्धको १०० दिन पूरा भएको छ । गत अक्टोबर ७ मा हमास लडाकुले इजरायलमा प्रवेश गरेर हिंसा मच्चाएसँगै शुरु भएको लडाइँपछि इजरायलले लगातार शक्तिशाली आक्रमण गरी गाजाको अधिकांश क्षेत्र ध्वस्त पारेको छ ।
हालसम्म गाजा, वेस्ट ब्यांक तथा तेल अभिव लगायतका ठाउँमा गरी इजरायली सेनाको कारबाहीमा २४ हजार प्यालेस्टिनी मारिएका छन् । इजरायलमा भने हमासले कब्जा गरेका आफन्तको रिहाइको माग गर्दै प्रदर्शन भएको छ । हजारौँ मानिसले राजधानी तेल अभिव, जेरुसेलम लगायतका शहरमा प्रदर्शन गरेका छन् ।
हमासले ७ अक्टोबरमा इजरायलका विभिन्न ठाउँमा आक्रमण गरी नेपालका विपीन जोशीसहित इजरायलसहित विभिन्न देशका झण्डै ३०० मानिसलाई बन्धक बनाएको थियो । बिचमा भएको युद्धविराममा केही बन्धक छुटे पनि ठूलो संख्याका बन्धक अझै छुट्न सकेका छैनन् ।
यसैबीच प्रेस फ्रिडम ग्रुपले गाजा युद्धमा रिपोर्टिङका क्रममा ठूलो संख्यामा पत्रकार मारिएको भन्दै पत्रकारको सुरक्षाका लागि अपिल गरेको छ । ७ अक्टोबरयता इजरायल–गाजा युद्धको रिपोर्टिङ गरिरहेका ८२ पत्रकार मारिएका छन् ।
