२८ माघ, एजेन्सी ।
जेलमा रहेका पाकिस्तानी विपक्षी नेता इमरान खानको पार्टीको समर्थनमा रहेका उमेदवारले सरकार गठन गर्ने योजना बनाएका छन् । पूर्वप्रधानमन्त्री खानका तत्कालीन निकट सहयोगीले अन्तिम चुनावी नतिजा सार्वजनिक नगरे शान्तिपूर्ण विरोध गर्न समर्थकलाई आग्रह गरेका छन् । बिहीबार भएको निर्वाचनमा पाकिस्तानका २४ करोड १० लाख नागरिकले मतदान गरेका थिए ।
खानको पार्टी पाकिस्तान तेहरिक–ए–इन्साफ (पीटीआई) ले चुनाव जितेको दाबी गर्दै देशका धेरै भागमा विरोध प्रदर्शन गर्ने घोषणा गरेको छ। पार्टीले चुनावमा पाएको जनादेश लुट्ने प्रयास भइरहेको दाबी गरेको छ। पार्टीले लाहोर, फैसलाबाद, रावलपिंडी, मुल्तान, बहावलपुर, डेरा गाजी खान र गुजरनवालामा कार्यकर्ताहरूलाई प्रदर्शन गर्न आग्रह गरेको छ।
अहिलेसम्मको नतिजामा पीटीआईले समर्थन गरेका स्वतन्त्र उम्मेदवारले सबैभन्दा बढी सिट जितेका छन्। पीटीआईले दिउँसो २ बजे लाहोरको लिबर्टी चोकमा शान्तिपूर्ण प्रदर्शनको तयारी गर्न कार्यकर्तालाई निर्देशन दिएको छ। पीटीआईले एक्समार्फत जनादेश खोस्ने प्रयासको विरोधमा दक्षिणी पञ्जाबमा शान्तिपूर्ण प्रदर्शन गरिने बताएको छ।
मतदान सकिएको तेस्रो दिन भइसक्दा पनि राष्ट्रिय सभाका सात सिटको मतपरिणाम आउन बाँकी छ। यी सबै सिट बलुचिस्तानका हुन्। यसअघि शनिबार पीटीआईका अध्यक्ष गौहर अली खानले आफ्नो पार्टीका कार्यकर्ताहरूले शनिबार रातिसम्म नतिजा घोषणा नहुने सिटका मतगणना केन्द्रबाहिर विरोध प्रदर्शन गर्ने बताएका थिए।
आर्थिक संकटसँग संघर्ष गरिरहेको पाकिस्तानमा गम्भीर ध्रुवीकृत राजनीतिक वातावरणले चुनावी नतिजा समेत अस्तव्यत बनाएको छ । खान र उनका मुख्य प्रतिद्वन्द्वी तीन पटक पाकिस्तानका प्रधानमन्त्री बनेका नवाज सरिफ दुवैले शुक्रबार चुनावमा विजयको घोषणा गरेका थिए । यससँगै त्यहाँ सरकार कसले गठन गर्छ भन्ने अनिश्चितता बढेको छ ।
खानको पाकिस्तान तहरीक इन्साफ (पीटीआई)का अध्यक्ष गोहर खानले सबै संस्थालाई आफ्नो पार्टीको जनादेशलाई सम्मान गर्न आह्वान गरेका छन् । यस्तै, सरिफले पनि शुक्रबार आफ्नो पार्टी बलियो भएर अगाडि आएको भन्दै गठबन्धन सरकार गठन गर्न अरुपार्टीसँग छलफल गर्ने भनेका थिए ।
पाकिस्तानको निर्वाचन आयोगका अनुसार कुल २६६ सिटमध्ये पछिल्लो चुनावी नतिजाले स्वतन्त्र उमेदवारले १०० सिट जितेका छन् । सरिफको पाकिस्तान मुस्लिम लिग नवाज (पीएमएल–एन)ले ७२ सिट जितेको छ । चुनाव चिह्न नपाएपछि खानको पार्टी पीटीआईका नेताहरू स्वतन्त्र उमेदवार भएर चुनाव लडेका थिए ।
