२५ चैत, एजेन्सी ।
गाजासँग सम्झौता गरेर बन्धक फिर्ता गर्न माग गर्दै इजरायलमा प्रदर्शन भएको छ । इजरायली सेनाले एकजना बन्धकको शव फेला पारेपछि इजरायलको राजधानीसहित मुख्य सहरमा दशौं हजारले प्रदर्शन गरेका छन् । प्रदर्शनकारीले तत्काल गाजासँग सम्झौता गरेर बाँकी रहेका बन्धक फिर्ता ल्याउन र शान्ति कायम गर्न माग गरेका छन् । अक्टोबर ७ मा प्यालेस्टिनी लडाकू समूह हमासले इजरालमा आक्रमण गर्दा दुई सय ५३ जनालाई बन्धक बनाएर लगेको थियो ।
उनीहरुमध्ये एक सय २४ जना रिहा भएका छन् । बाँकी एक सय २९ जनामध्ये इजरायली सेनाले अहिलेसम्म १४ जनाको शव फेला पारेको छ । छ महिना पूरा भएको युद्धमा इजरायली सेनाको आक्रमणबाट गाजामा ३३ हजार एकसय जनाभन्दा धेरैको ज्यान गएको छ । नोभेम्बरमा एक हप्ताको युद्धविरामपछि पुनः शुरु भएको वार्तामा कुनै प्रगति भएको छैन ।
यसैबीच विश्व स्वास्थ्य संगठन (डब्लुएचओ) ले शनिबार इजरायली आक्रमणपछि गाजाको सबैभन्दा ठूलो अस्पताल खरानीमा परिणत भएको र धेरैवटा शव फेला परेको बताएको छ । इजरायली सुरक्षा बलहरू गाजा सहरको अल–शिफा अस्पतालबाट दुई हप्ताको सैन्य कारबाही पछि बाहिर आएका थिए ।
डब्ल्यूएचओ मिसन अन्ततः शुक्रबार यस अस्पतालमा प्रवेश गर्न सफल भयो । जहाँ डब्लुएचओले २५ मार्चदेखि जाने प्रयास गरिरहेको थियो । डब्ल्यूएचओ प्रमुख टेड्रोस अधानोम गेब्रेयससले ट्विट गर्दै यस अस्पतालको अवस्थाबारे जानकारी दिएका छन् । उनले भनेका छन्, ‘डब्ल्यूएचओ र यसका साझेदार अल–शिफामा पुग्न सफल भए, जुन गाजाको स्वास्थ्य प्रणालीको मेरुदण्ड थियो ।
हालैको घेराबन्दी पछि यो मानव चिहानमा परिणत भएको छ।’ उनले आफ्नो टोलीले त्यहाँ कम्तीमा पाँचवटा शव फेला पारेको बताएका छन् । उनले भनेका छन्, ‘हामीले कम्प्लेक्सका अधिकांश भवन नराम्ररी ध्वस्त भएको र अधिकांश सामान नष्ट भएको वा खरानीमा परिणत भएको पायौँ।’
