४ वैशाख , विराटनगर।
कोशी प्रदेश सरकारले प्रदेश सभाकी पूर्वसांसद विन्दिया कार्कीलाई प्रदेश खेलकुद विकास बोर्ड उपाध्यक्ष नियुक्त गरेको छ । गएको चैत ९ गते कोशी प्रदेश सरकारले कार्कीलाई प्रदेश खेलकुद विकास बोर्डको उपाध्यक्षमा नियुक्त गरेपछि उनले पदभार ग्रहरण गर्दै विभिन्न खेलकुद कार्यक्रमहरुमा समेत उपाध्यक्षका रुपमा सहभागिता जनाइसकेकी छन् ।
भर्खरै विराटनगरमा सम्पन्न विराट गोल्डकपमा समेत उनको सक्रिय सहभागिता देखिएको थियो । तर विन्दियाले पदभार ग्रहण गरेको एक महिना पुग्न लाग्दा समेत बोर्डको आधिकारी वेभसाइटमा भने अझै उपाध्यमा जिना कार्की नै भएको उल्लेख गरिएको छ । यसअघि २०७८ साल चैत २२ गते प्रदेश खेलकुद विकास बोर्डको उपाध्यक्षमा नियुक्त भएकी जिना कार्की लामो समयदेखि अमेरिकामा छिन्।
उनले नेपाल छाडेपछि मुख्यमन्त्री केदार कार्कीको सिफारिसमा पूर्वसांसद कार्कीलाई नियुक्त गरिएको छ । यस्तै प्रदेश सरकारले बोर्डको सदस्यमा मदन खड्का र गौरीमान राईलाई नियुक्त गरेपनि उनीहरुको समेत नाम वेभसाइटमा समावेश गरिएको छैन् । अझ सबैभन्दा बिडम्बनाको कुरा त बोर्डको अध्यक्षमा अझै पनि पूर्वसामाजिक विकास मन्त्री बुद्धिकुमार राजभण्डारी नै रहेको उल्लेख गरिएको छ ।
राजभण्डारीपछि प्रदेशमा झण्डै आधादर्जन मन्त्रीहरु फेरिसक्दा समेत बोर्डले आफ्नो आधिकारिक वेभसाइट अधावधिक गरेको छैन् । यस्तै बोर्डले आफ्नो वेभसाइटमा प्रदेशको नाम समेत उल्लेख गर्न कन्जुस्याई गरेको छ । वेभसाइटमा कहीपनि प्रदेशको नाम कोशी प्रदेश उल्लेख गरिएको छैन् ।
कोशी साटो बोर्डको लोगोमा अझै पनि प्रदेश १ उल्लेख गरिएको छ । यस्तै बोर्डको स्थान खोजीमा पनि प्रदेश खेलकुद विकास बोर्ड प्रदेश १ नै उल्लेख गरिएको छ । बोर्डको सदस्य सचिवमा नेकपा एकीकृत समाजवादीबाट सिफारिस भएका हंसराज वाग्ले रहेका छन् । तत्कालीन प्रदेश नं. १ को प्रदेशसभाबाट पारित भएको ‘प्रदेश खेलकुद ऐन २०७६’ अनुशार २०७८ असोज २४ गते प्रदेश खेलकुद बोर्ड गठन भएको थियो ।
जसको संस्थापक सदस्य सचिवमा परशुराम बस्नेत रहेका थिए । उनलाई सरकार परिवर्तनसँगै ६ महिनापछि पदमुक्त गरी सदस्य सचिवमा २०७८ चैत २२ गते हंशराज वाग्लेलाई नियुक्त गरिएको थियो ।
