२४ जेठ, एजेन्सी ।
आईसीसी टी–२० विश्वकप २०२४ को आफ्नो पहिलो खेलमा भारत विजयी भएको छ । गएराति न्यूयोर्कमा भएको खेलमा उपाधि दाबेदार मानिएको भारतले आयरल्याण्डलाई आठ विकेटले हराएको हो । आयरल्याण्डले दिएको मात्र ९७ रनको लक्ष्य भारतले १२ ओभर दुई बलमा दुई विकेट गुमाएर भेट्टायो । भारतका लागि कप्तान रोहित शर्माले सर्वाधिक ५२ रन बनाए । जितका लागि उनी नायक बने ऋषभ पन्तले अविजित ३६ रन जोडे ।
भारतका स्टार विराट कोहली र सूर्यकुमार भने सस्तैमा समेटिए । आयरल्याण्डका लागि मार्क एडेयर र बेन व्हाइटले एक–एक विकेट लिए । त्यसअघि टस हारेर पहिला ब्याटिङ गरेको आयरल्याण्डले १६ ओभरमा सबै विकेट गुमाएर ९६ रन बनायो । आयरल्याण्डका लागि ग्यारेथ डिलेनीले सर्वाधिक २६ रन बनाए । भारतका लागि हार्दिक पण्ड्याले तीन विकेट लिए ।
यस्तै समूह ’सी’ को खेलमा युगाण्डाले पपुवा न्यूगिनी (पीएनजी) लाई तीन विकेटले हराएको छ । पीएनजीले दिएको ७८ रनको लक्ष्य युगान्डाले १८ ओभर दुई बलमा सात विकेट गुमाएर भेट्टायो । युगाण्डाका लागि रियाजत अली शाहले सर्वाधिक ३३ रन बनाए । पीएनजीका लागि अले नाओले दुई विकेट लिए । यस्तै नर्मन भानुआ, चाड सोपर र असद वालाले समान एक विकेट लिए ।
यसअघि अमेरिकाको प्रोभिडेन्स क्रिकेट मैदानमा पपुवा न्यूगिनी १९ ओभर एक बलमा ७७ रनमा अल आउट भयो । उसका लागि हिरि हिरिले १५ रन बनाए । यस्तै लेगा सियाका र किप्लिन डोरिगाले समान १२ रन बाहेक अन्य व्याटरले दोहोर अङ्क जोड्न सकेनन् । यो जितसँगै युगाण्डाले समूह तालिकामा दुई अङ्क जोडेको छ । यता अस्ट्रेलियाले ट्वान्टी–२० विश्वकप २०२४ मा विजयी सुरुआत गरेको छ ।
समूह ‘बी’ को खेलमा अस्ट्रेलियाले सजिलै ओमानलाई ३९ रनले हराएको हो । ओमानको भने यो लगातार दोस्रो हार हो । जितका लागि १ सय ६५ रनको लक्ष्य पाएको ओमानले २० ओभरमा नौ विकेट गुमाएर १ सय २५ रन मात्र बनाउन सक्यो । ओमानका लागि आयान खानले ३० बलमा बनाएको ३६ रन नै सर्वाधिक ठूलो व्यक्तिगत स्कोर रह्यो ।
यस्तै मोहरन खानले २७ रनको योगदान गरे । अस्ट्रेलियाली बलरमध्ये मार्कस स्टोइनसले तीन ओभरमा १९ रन खर्चेर तीन विकेट लिए । यस्तै मिचेल स्टार्क, नथान एलिस र एडम जाम्पाले दुई दुई विकेट लिए । त्यस अगाडि पहिले ब्याटिङ गरेको अस्ट्रेलियाले पाँच विकेटमा १ सय ६४ रन बनाएको थियो ।
त्यसमा ब्याटबाट पनि चम्केका स्टोइनसले ३६ बलमा ६७ रन बनाए । उनले दुई चौका र छ छक्का प्रहार गरे । यस्तै ओपनर डेविड वार्नरले ५१ बलमा ५६ रन जोडे । उनले भने छ चौका र एक छक्का प्रहार गरे । विश्वकप अन्र्तगत आज राति आयोजक अमेरिका र पाकिस्तानको खेल हुनेछ । यो अमेरिकाको दोस्रो खेल हो भने पाकिस्तानको पहिलो खेल हो । यसअघि अमेरिकाले क्यानडालाई पराजित गरेको थियो ।
