१६ असार, एजेन्सी ।
टी–२० विश्वकप क्रिकेटको नवौँ संस्करणको उपाधि भारतले उचालेको छ । खेलको अन्तिम समयमा दक्षिण अफ्रिकातर्फ मोडिसकेको उपाधि एकाएक भारतीय बलर लयमा फर्किएपछि फाइनलमा दक्षिण अफ्रिकामाथि सात रनको रोमाञ्चक जित हासिल गर्दै उपाधिमाथि कब्जा जमाएको हो । यसअघि भारतले सन् २००७ मा पहिलो संस्करणको उपाधि चुमेको थियो ।
१७७को लक्ष्य पछ्याएको दक्षिण अफ्रिकाले आफ्ना ओपनर सस्तैमा गुमाएपछि भारत खेलमा सुरुवातमा हाभी भएको थियो । रोमाञ्चक बनेको अन्तिम समयको खेलमा जितको अत्यन्तै नजिक पुगेर दक्षिण अफ्रिका पहिलो पटक विश्वकप क्रिकेटको उपाधि हात पार्ने योजना असफल भयो । एक सय ७७ रनको लक्ष्य पछ्याएको दक्षिण अफ्रिका कुनै समय जिततर्फ अग्रसर थियो ।
तर त्यो जितको लक्ष्यमा भारतका हार्दिक पाण्ड्या उत्कृष्ट फर्ममा प्रस्तुत भएपछि अन्तिम समयमा आएर दक्षिण अफ्रिका उपाधिबाट विमुख हुनु पग्यो । दक्षिण अफ्रिकाले निर्धारित २० ओभरमा आठ विकेट गुमाएर एक सय ६९ रनमात्र बनाउन सक्यो । खासगरी फाइनल खेलको अन्तिम पाँच ओभर निकै महत्वपूर्ण थियो । दक्षिण अफ्रिकालाई जितका लागि अन्तिम ३० बलमा ३० रन आवश्यक थियो ।
त्यतिबेलासम्म दक्षिण अफ्रिकाका ६ ब्याट्सम्यान बाँकी नै थिए । १६औँ ओभरमा हेनरिक क्लासेन र डेभिड मिल्लर उत्कृष्ट ब्याटिङ गरिरहेका थिए । क्लोसेन २२ बलमा ४९ रन र मिल्लर सात बलमा १४ रन बनाउँदै दक्षिण अफ्रिकालाई जिततर्फ डो¥याउन अग्रसर थिए । समग्रमा १५औँ ओभरको खेल सकिँदासम्म दक्षिण अफ्रिकाले जित्ने लगभग अनुमान गरिएको थियो । तर, अन्तिम पाँच ओभरमा खेलमा नाटकीय परिवर्तन देखियो ।
जिततर्फ अग्रसर दक्षिण अफ्रिका एकाएक दबाबमा पर्यो । अन्तिम पाँच ओभरभित्र भारतीय बलर र फिल्डरले उत्कृष्ट प्रदर्शन गरेपछि दक्षिण अफ्रिका पहिलो पटक टी–२० विश्वकपको उपाधि उचाल्नबाट चुक्यो । १६औँ ओभरमा बुमराहले केवल चार रन दिए । १५औँ ओभरको समाप्तिमा दक्षिण अफ्रिकी टोलीको स्कोर चार विकेटको नोक्सानीमा एक सय ४७ रन थियो ।
क्लासेन ४९ र मिल्लर १४ रनमा क्रिजमा थिए । यी दुबै टोलीका अनुभवी खेलाडी हुन् । भारतीय टोलीका कप्तान रोहित शर्माले १६औँ ओभर बलिङ गर्ने जिम्मा जसप्रित बुमराहलाई दिए । बुमराहले पनि १६औँ ओभरमा निकै किफायती बलिङ गरे । बुमराहले त्यो ओभरमा तीनवटा बलमा त एक रन पनि दिएनन् । त्यसपछि दक्षिण अफ्रिकाका ब्याट्सम्यानमाथि दबाब बढ्न थाल्यो ।
त्योभन्दा अघिल्लो ओभरमा भारतीय बलर अक्षर पटेलले २४ रन खर्चिएका थिए । त्यही ओभरको अक्षरले खर्चिएको २४ रनले दक्षिण अफ्रिका जिततर्फ नजिक देखिएको थियो । तर १६औँ ओभरमा बुमराहले उत्कृष्ट बलिङ गरेपछि नै भारतीय टोलीमा जितको केही आशा पलाएको थियो । अनि १७औँ ओभरमा हार्दिक पाण्ड्या भारतका लागि जिवनदाता भएर फर्किए ।
उनले उच्च लयका क्लासेनलाई पेभेलियन फर्काए । कप्तान रोहितले १७औँ ओभर बलिङ गर्ने जिम्मा हार्दिक पाण्ड्यालाई दिएका थिए । रोहितको त्यो निर्णय नै विश्वकप जिताउने निर्णय बन्यो । हार्दिक नभएको भए के हुने थियो होला ? यो प्रश्न अहिले भारतीय प्रशंसकहरु माझ उब्जिएको छ । आइपीएलमा मुम्बई इन्डियनसको कप्तानी गर्दै रोहितलाई खेलाएका हार्दिक रोहितको कप्तानीमा विश्वकपका लागि नायक बने ।
आइपीएलमा आलोचक बनेका हार्दिक अहिले प्रशंसाको पात्र बनेका छन् । हार्दिकले आफ्नो पहिलो बलमै मैदानमा जमिसकेका ब्याट्सम्यान हेनरिक क्लासेनलाई पेभेलियन फर्काए । हार्दिकले त्यो बल ‘अफ साइड’मा ब्याट्सम्यानभन्दा केही पर फालेका थिए । क्लासेनले त्यो बललाई खेल्ने प्रयास गरे । ब्याट्को छेउमा थोरै ठोक्किएर बल विकेटकिपर ऋषभ पन्तको हातमा पुग्यो ।
भारतका लागि त्यो जित तर्फ डोर्याउने टर्निङ पोइन्ट थियो । क्लासेन आउट भएपछि मार्को जानसेन क्रिजमा आएका थिए । हार्दिकले दोस्रो बलमा पनि रन बनाउन दिएनन् । बाँकी चार बलमा पनि हार्दिकले केवल चार रन खर्चिएका थिए । १७औँ ओभरको खेल सकिँदा दक्षिण अफ्रिकालाई जितका लागि ११ बलमा २२ रन आवश्यक थियो । रोहितले १८औँ ओभर बलिङ गर्ने जिम्मा बुमराहलाई दिएका थिए ।
बुमराहको यो ओभरपछि त खेलमा भारतको पकड निकै बलियो बनेको थियो । बुमराहले अघिल्लो दुई बलमा एक रन पनि दिएनन् । तेस्रो बलमा मिल्लरले एक रन बनाउँदै मार्को जानसेनलाई स्ट्राइक दिएका थिए । चौथो बलमा बुमराहले जानसेनलाई बोल्ड गरे । बुमराहले १८औँ ओभरमा केवल दुई रन खर्चिएका थिए । १८औँ ओभरको खेल सकिँदा दक्षिण अफ्रिकाले ६ विकेट गुमाएर एक सय ५७ रन बनाएको थियो ।
दक्षिण अफ्रिकालाई जितका लागि १२ बलमा २० रन आवश्यक थियो । रोहितले १९औँ ओभर बलिङ गर्ने जिम्मा तिब्रगतिका बलर अर्शदीप सिंहलाई दिएका थिए । त्यतिबेला दक्षिण अफ्रिकी ब्याट्सम्यान मिल्लर र केशव महाराज क्रिजमा थिए । अर्शदीपले यो ओभरमा तीन बलमा एक रन पनि दिएनन् । यो ओभरमा दक्षिण अफ्रिकाले केवल चार रनमात्र बनाउन सक्यो । त्यसपछि दक्षिण अफ्रिकालार्य अन्तिम ६ बलमा जितका लागि १६ रन आवश्यक थियो ।
दक्षिण अफ्रिकाका मिल्लर १६ बलमा २१ रन बनाउँदै क्रिजमा थिए । अन्तिम ओभरमा पनि भारतका लागि सबैभन्दा ठुलो खतरा मिल्लर नै थिए । भारतीय कप्तान रोहितले अन्तिम ओभर बलिङ गर्ने जिम्मा हार्दिक पाण्ड्यालाई दिएका थिए । हार्दिकको पहिलो बलमा मिल्लरले छक्का हिर्काउने प्रयास गरे ।
तर, बाउन्ड्री लाइननजिकै फिल्डिङ गरिरहेका सूर्यकुमार यादबले उत्कृष्ट क्याच लिँदै मिल्लरलाई पेभेलियन फर्काए , त्यसपछि भारतको जित सुनिश्चित जस्तै देखियो । मिल्लर आउट भएपछि कागिसो राबडा क्रिज समाल्न आएका थिए । क्रिज समाल्न आउनुसाथ उनले चौका प्रहार गरेका थिए । त्यसपछि दक्षिण अफ्रिकालाई जितका लागि अन्तिम चार बलमा १२ रन आवश्यक थियो ।
पाँचौँ बलमा हार्दिकले राबडालाई पनि सूर्यकुमार यादबमार्फत नै क्याच गराएका थिए । त्यसपछि अन्तिम बलमा दक्षिण अफ्रिकाले एक रनमात्र बनाउन सक्यो । हार्दिकले अन्तिम चार ओभरमा तीन महत्वपूर्ण विकेट लिए । यसरी सात रनले खेल जित्दै भारतले उपाधिमाथि १७ वर्षपछि कब्जा जमाएको छ ।
