२६ असार, विराटनगर ।
कोशी प्रदेशका मुख्यमन्त्री हिक्मतकुमार कार्कीले पहाडमा बसाईसराईको समस्या बढ्दै गएकोमा चिन्ता व्यक्त गर्दै बसाईसराई रोक्ने गरी काम गर्नुपर्नेमा जोड दिएका छन् ।
बुधबार तेह्रथुममा कर्मचारीहरूलाई निर्देशन दिँदै मुख्यमन्त्री कार्कीले नेपाल प्राकृतिक हिसाबले सुन्दर भएकाले कृषि पर्यटन मार्फत रोजगारी सिर्जना गरेर पहाडको बसाईसराई रोक्ने काम गर्नुपर्ने बताएका हुन् ।
उनले भने, ’पहाडमा सडक र बाटो पुग्न थाले। तर मानिसहरू चाहिँ झोला तुम्बा बोकेर मधेश झर्न थाले। यो चिन्ताको विषय हो। यसलाई रोक्न सबै लाग्नुपर्यो।’
पहाडमा सडक र बाटो पुग्न थाले। तर मानिसहरू चाहिँ झोला तुम्बा बोकेर मधेश झर्न थाले। यो चिन्ताको विषय हो। मुख्यमन्त्रीले भने यसलाई रोक्न सबै लाग्नुपर्यो।’
यस्तै उनले तिनै तहका संरचनाका कर्मचारीले सहकार्य, सहस्तित्व र समन्वयमा काम गर्नुपर्ने बताए । मुख्यमन्त्री कार्कीले तिनै तह मिलेर काम गर्दा नागरिकलाई सहज हुने बताए ।
सबै कर्मचारी जिम्मेवार नागरिक भएकाले सोही अनुरूप नागरिक सेवामा लाग्न उनले कर्मचारीहरूलाई निर्देशन दिए ।
अर्को प्रसङ्गमा उनले असारे विकास प्रवृत्तिलाई रोक्नका लागि आगामी साउनदेखि नै कार्ययोजना बनाएर १ करोड माथिका योजना पहिलो चौमासिकमै कार्यान्वयनमा लैजाने बताए । उनले त्यसका लागि आवश्यक पर्ने विधि प्रक्रिया टुङ्ग्याएर काम चाँडै थाल्ने बताए ।
वित्तीय प्रगतिको हिसाबले कोशी प्रदेश उत्कृष्ट प्रदेश रहेको बताउँदै मुख्यमन्त्री कार्कीले आगामी वर्ष वित्तीय प्रगति बढाउने उनले बताए ।
कार्यक्रममा कोशी प्रदेशका प्रमुख सचिव केदारनाथ शर्माले जनताको भावना बुझेर काम गर्न कर्मचारीहरूलाई निर्देशन दिए ।
सो कार्यक्रममा तेह्रथुमकी प्रमुख जिल्ला अधिकारी मिरा अर्यालले जिल्लाको वस्तुस्थितिका बारेमा जानकारी गराएकी थिइन ।
