८ साउन, काठमाण्डौ ।
गाजापट्टीमा हमासविरुद्ध लडाई लडिरहेको द्धन्दग्रस्त मुलक इजरायल दुई हजार नेपाली श्रमिकलाई केयर गिभरका रुपमा रोजगारी दिन सहमत भएको छ । नेपालका लागि इजरायली राजदूत हनान गोदारले श्रम, रोजगार तथा सामाजिक सुरक्षामन्त्री शरदसिंह भण्डारीसँग गरेको शिष्टाचार भेटमा यस्तो सहमति भएको हो ।
भेटका क्रममा राजदूत हनान गोदारले इजरायल नेपाली श्रमिकको संख्या वृद्धि गर्न सहमत भएको बताएका हुन् । हाल छनोटका चरणमा रहेका ५ सय जना मुख्य उम्मेदवार र ३ सय वैकल्पिक उम्मेदवार गरी कूल ८ सय नेपाली श्रमिक इजरायल लैजाने भनिएकामा सो सङ्ख्या बढाएर १ हजार मुख्य उम्मेदवार र १ हजार वैकल्पिक उम्मेदवारगरी कूल २ हजारसम्म नेपाली लैजान सकिने गरी सहमति भएको छ ।
सहायक कामदार (केयर गिभर)ले इजरायलमा १ वर्षदेखि ५ वर्षसम्म काम गर्न पाउने छन् । ४० प्रतिशत पुरुष र ६० प्रतिशत महिलाका लागि कोटा छ । केयरगिभरका लागि जाने नेपालीले ५ हजार ८८० सेकेल (इजरायली मुद्रा) महिनाको न्यूनतम तलब तोकिएको छ । यो नेपाली करिब २ लाख ११ हजार रूपैयाँ हुन्छ ।
केयर गिभरका लागि इजरायलमा काम गर्न जाने आवेदकले केयर गिभरसम्बन्धी ३ महिनाको तालिम लिएको हुनुपर्ने छ । २५ वर्षदेखि ४५ वर्षसम्मकाले आवेदन दिन सक्ने छन् । आवेदन दिन कम्तीमा १० कक्षा उत्तीर्ण गरी अनमी वा सीएमएसम्बन्धी विषयमा कम्तीमा १५ महिनाको अध्ययन पूरा गरेको वा कक्षा १२ सो सरहको शैक्षिक योग्यता भएको हुनुपर्ने छ ।
भेटमा द्विपक्षीय श्रम सम्बन्धमा विविध पक्षका साथै ‘जिटुजी’ प्रक्रियाअन्तर्गत केयरगिभरका रुपमा नेपाली श्रमिक इजरायल पठाउने सिलसिलामा भइरहेको छनोट प्रक्रियाबारे समेत छलफल भएको थियो । आगामी दिनमा कृषिलगायत अन्य क्षेत्रमा समेत नेपाली श्रमिक इजरायल लैजान सकिनेबारेमा समेत कुराकानी भएको मन्त्रालयका प्रवक्ता गोविन्दप्रसाद रिजालले जानकारी दिए ।
सो क्रममा मन्त्री भण्डारीले नेपाल–इजरायलबीचको श्रम सम्बन्धका बारेमा सन्तोष व्यक्त गर्दै इजरायल–प्यालेष्टाइन द्वन्द्वमा हराइरहेका नेपाली विपिन जोशीको खोजतलास एवं वास्तविक अवस्थाबारे जानकारी र सकुशल फिर्ता गराउने विषयमा थप पहल लिन अनुरोध गरेका थिए । द्वन्द्वग्रस्त मुलुक इजरायलमा नागरिक पठाउन लागिएको भन्दै आलोचना भइरहेको छ । इजरायल–प्यालेस्टाइन द्वन्द्वमा हराएका नेपाली नागरिक विपिन जोशी अहिलेसम्म बेपत्ता रहेका छन् ।
