२९ साउन , काठमाण्डौ ।
राष्ट्रिय स्वतन्त्र पार्टीका सांसद हरि ढकाललाई सभामुख देवराज घिमिरेले प्रतिनिधिसभाको बैठकमा बोल्न रोकेपछि विपक्षी दलले आपत्ति जनाएका छन्। प्रतिनिधिसभाको बैठकको आकस्मिक समयमा बोल्ने क्रममा सांसद ढकालले विद्युत महसुलको विषयमा बोल्न थालेपछि सभामुखले माइक काटेका थिए। सभामुखले सांसद ढकाललाई बोल्न रोकेपछि रास्वपा, राप्रपा र माओवादीसहित विपक्षी दलको नेताहरूले उठेर विरोध जनाएका छन् ।
सभामुखले विषय केन्द्रित भएर नबोलेको भन्दै सभामुखले रोकेका थिए। त्यसपछि सभामुख घिमिरेले रास्वपा सभापति रवि लामिछानेलाई दुई मिनेटको बोल्न समय दिए। उनले सांसद ढकाललाई बोल्न रोकेको प्रति आपत्ति जनाए। उनले आफूले भन्दा हरि ढकाललाई नै बोल्न दिन आग्रह गरे । तर पनि सभामुखले हरि ढकालको साटो राप्रपाका अध्यक्ष राजेन्द्र लिङ्देनलाई बोल्न समय दियो ।
यो समयमामा पनि रास्वपाका सांसदहरु उभिरहे । सो क्रममा लिङदेनले सांसदलाई यो बोल्न पाइन्छ त्यो पाइँदैन भन्ने कुरा आफूहरूलाई मान्य नहुने बताए। उनले भने, ‘जनताका प्रतिनिधिले आफ्ना कुरा राख्छन्। संविधान र संसदको नियमावली विपरीत भयो भने सभामुखले रोक्ने आफ्नो ठाउँमा छ। तर यो विषय बोल्न पाइँदैन भन्ने कुरा मान्य हुँदैन। सांसदको विशेष अधिकारलाई नियन्त्रण गर्ने कुरा मान्दैनौँ।’
लिङदेनको भनाइपछि रास्वपा ,राप्रपा र माओवादीका सांसदहरुले समेत उभिएर विरोध जनाएपछि सभामुखले आकस्मिक समयको नियमावलीको व्यस्था पढेर सुनाएका थिए । यति गर्दा समेत प्रतिपक्ष दलका सांसदहरुले विरोध गर्न नछाडेपछि सभामुखले हरि ढकाललाई बोल्न समय उपलब्ध गराएपछि सभा सहज रुपमा सुचारु भएको छ ।
आकस्मिक समयमा ढकालले पाएको थप समयमा प्रधानमन्त्री ओलीलाई ६ उद्योगीहरुको काटिएको लाइन जोड्न निर्देशन दिएजस्तै उनीहरुले नतिरेको बक्यौता तत्काल उठाउन निर्देशन दिन आग्रह गरे । उद्योगीहरुले ६ अर्ब नतिरेको विषयमा सधै आकस्मिक समयको विषय बन्ने बताए । उनले करदाताहरुको करमाथि लामो हात गर्ने विषय सधै आकस्मिक समयको विषय हुने बताए ।
