२९ साउन, विराटनगर । युरोपियन मुलुक फ्रान्सको राजधानी पेरिसमा हालै सम्पन्न ३३औँ गृष्मकालीन ओलम्पिकमा स्वर्ण पदक जितेका पाकिस्तानी खेलाडी अरशद नदिमले १० करोड रुपैयाँ पाएका छन् ।
पेरिस ओलम्पिकमा पाकिस्तानको तर्फबाट एक मात्र पदक जित्ने खेलाडी बनेका २७ वर्षीय नदिमलाई पाकिस्तानको पञ्जाब प्रान्तकी मुख्यमन्त्री मरियम नवाज सरिफले १० करोड रुपैयाँ पुरस्कार दिएकी हुन् ।
मरियमले नदीमलाई होन्डा सिभिक कार पनि दिएकी छन् । अझ रमाइलो कुरा त के छ भने कारको नम्बर पनि ९२.९७ रहेको छ ।
अरशदले ओलम्पिकमा एथलेटिक्सको पुरुष ज्याभलिन थ्रो स्पर्धामा ९२.९७ मिटर टाढा भाला फालेका थिए ।
नदिमले भारतीय खेलाडी निरज चोपडालाई पछि पार्दै स्वर्ण जितेका थिए । पेरिस ओलम्पिकमा पाकिस्तानले जितेको यो एकमात्र पदक हो ।
त्यसबाहेक नदिम ओलम्पिकमा पाकिस्तानका लागि व्यक्तिगत रूपमा स्वर्ण पदक जित्ने पहिलो खेलाडी पनि बनेका थिए ।
पछिल्लो ३२ वर्षपछि पाकिस्तानले पदक जितेको हो । यसअघि सन् १९९२ मा स्पेनको बार्सिलोनामा भएको ओलम्पिकमा पाकिस्तानले मेडल जितेको थियो ।
अरशदले गोल्ड जितेसँगै पाकिस्तानले ओलम्पिक पदकको संख्या चार पुर्याएको छ । उनले जितेको स्वर्ण पदककै कारण पनि पदक तालिकामा पाकिस्तानलाई भारतभन्दा पनि माथि उभ्याउन मद्दत पुर्यायो । भारतले पेरिस ओलम्पिकमा एक रजत र पाँच कांस्य पदक जितेको छ ।
‘गोल्ड मेडल’ सँगै अरशदले ५० हजार डलर पुरस्कार पनि पाएका थिए । अझ नदिमले आफ्नो ससुरालीबाट पुरस्कारस्वरूप भैंसी पाउने खबर उनी अझ चर्चामा आए ।
अरशदका ससुरा मुहम्मद नवाजले सञ्चारमाध्यममार्फत् भैंसी पुरस्कार दिने घोषणा गरेका थिए । खासमा अरशद नदिमको गाउँमा भैंसी पुरस्कार दिइनुलाई निकै सम्मानित रूपमा हेरिन्छ ।
अरशद नदिमको ससुराका चार छोरा र तीन छोरी छन् । त्यसमध्ये सबैभन्दा कान्छी छोरी आयशासँग अरशद नदिमले विवाह गरेका हुन् ।
شاباش ارشد ندیم 🇵🇰 pic.twitter.com/0Da12Tip2k
— Maryam Nawaz Sharif (@MaryamNSharif) August 13, 2024
