३१ साउन, विराटनगर ।
मोरङको केराबारी गाउँपालिकामा सर्पले डसेर ६ वर्षीया बालिकाको मृत्यु भएको छ । मृत्यु हुनेमा केराबारी-९ स्थित स्कुल चौकका मनोज पण्डितकी छोरी प्रतीमा पण्डित रहेकी छन् ।
बुधबार साँझ विद्यालयबाट घर फर्केपछि शौचालयमा गएको बेला प्रतीमालाई विषालु सर्पले डसेको थियो ।
सर्पले डसेको कुरा अभिभावकले थाहा पाउनासाथ बालिकालाई उपचारका लागि तत्काल इटहरीस्थित सर्प दंश उपचार केन्द्र पठाइएको थियो ।
त्यहाँ उपचार सम्भव नभएपछि उनलाई विराटनगरको अस्पतालमा रिफर गरिएको थियो । तर, अस्पताल पुग्दा चिकित्सकहरूले बालिकाको मृत्यु भइसकेको बताएका थिए ।
