३२ साउन , काठमाण्डौ ।
भारतीय विदेश मन्त्रालयका विदेश सचिव विक्रम मिस्री नेपालको भ्रमण पूरा गरी फर्किए लगत्तै अमेरिकी विदेश मन्त्रालयका उपविदेशमन्त्री रिचार्ड आर. वर्मा आज काठमाडौं उत्रिएका छन् । केपी शर्मा ओली प्रधानमन्त्रीमा नियुक्त भएपछि अमेरिकाबाट भएको यो सबैभन्दा उच्च स्तरीय भ्रमण हो । उनले नेपालमा आज राष्ट्रपति रामचन्द्र पौडेल, प्रधानमन्त्री केपी शर्मा ओली, परराष्ट्र मन्त्री आरजु राणा देउवालगायत विभिन्न उच्च स्तरीय अधिकारीलाई भेट्ने नेपालस्थित अमेरिकी दूतावासले जनाएको छ ।
नेपाल भ्रमणका क्रममा बर्मा आज (शुक्रबार) काठमाडौँ आइपुगेको अमेरिकी दूतावासले जनाएको छ । काठमाडौँ आइपुगेका व्यवस्थापन तथा स्रोत सम्बन्धी उपविदेशमन्त्री बर्मालाई अमेरिकी राजदूत डिन आर. थम्पसनले स्वागत गरेका छन् । नेपाल भ्रमणका क्रममा उपविदेशमन्त्री बर्माले राजनीतिक भेटवार्तासहित सरकारी अधिकारी, यूएसएआईडी नेपालका कार्यक्रम कार्यान्वयन साझेदार, चिया विज्ञ र नेपाली व्यवसायीसँग भेटघाट गर्ने अमेरिकी दूतावासले जनाएको छ ।
आर्थिक विकास, महिला सशक्तीकरण, ऊर्जालगायतका क्षेत्रमा भएको समझदारीलगायतको विषयमा उनले छलफल गर्ने बताइएको छ । वर्मा अमेरिकी बाइडेन सरकारका शक्तिशाली मन्त्रीमध्येका एक हुन् । अमेरिकी विदेशमन्त्री एंथनी ब्लिकंनले वर्मालाई अगस्त ६ मा युक्रेनको आर्थिक अवस्था सुधारका लागि विशेष प्रतिनिधि नियुक्त गरेका थिए । उप विदेशमन्त्री वर्मालाई नेपालको जानकार मानिन्छ ।
अमेरिकी संसदमा फ्लोरिडाका रिपब्लिकन सांसद ब्रायन मस्टलले अमेरिकाले नेपालमा धार्मिक आस्था नभएका नागरिकका लागि वाइडेन प्रशासनले पाँच लाख अमेरिकी डलर खर्च गरेको दाबी गरेका थिए । त्यसको खण्डन विदेश मन्त्रालयका उप विदेशमन्त्री वर्माले नै गरेका थिए । उनले अमेरिका कुनै पनि धर्मका लागि अनुदान वा कुनै प्रकारको सहयोग नगरेको दाबी गरेका थिए ।
नेपालको एक दिने भ्रमण सकाएर उनी भोलि शनिवार भारतका लागि प्रस्थान गर्ने तालिका छ । उनी भारतमा भने अगस्ट २२ गतेसम्म रहने अमेरिकी विदेश मन्त्रालयले जनाएको छ । अमेरिकी आर्मीमा समेत काम गरिसकेका उनी भारतका लागि पूर्व अमेरिकी राजदूत पनि हुन् । यता परराष्ट्रमन्त्री डाक्टर आरजु राणा देउवा आइतबार भारत भ्रमणमा जाने भएकी छन् ।
तीन दिने भारत भ्रमणमा मन्त्री राणाले भारतीय समकक्षी डाक्टर एस. जयशंकरसँग भेटघाट गर्नेछिन् । भारतीय प्रधाधनमन्त्री नरेन्द्र मोदीसँग भने भेट हुने वा नहुनेबारेमा भने केही नखुलेको परराष्ट्र मन्त्रालाय स्रोतले जनाएको छ । यद्यपी, परराष्ट्र मन्त्रालयबाट भारत भ्रमणको औपचारिक जानकारी भने सार्वजनिक भएको छैन । भारतीय विदेश सचिव विजय मिश्रीकै निमन्त्रणामाा राणा भारत जान लागेको बताइएको छ ।
