विराटनगर,असोज ६
राष्ट्रिय मुस्लिम संघर्ष गठबन्धले असोज ४ गते बिहिबार सुनसरीको हरिनगर गांउपालिकामा अज्ञात समूहको गोली प्रहारबाट हत्या गरिएका खुर्शीद आलमको हत्या लगायतका घटना नियोजित डिजाइनमा हुने गरेको दाबी गरेको छ ।
गठबन्धले शनिबार विराटनगरस्थित नेपाल पत्रकार महासंघ मोरङ शाखामा पत्रकार सम्मेलनको आयोजना गरि हत्यारा पक्राउ गर्नुका साथै घटनाको बिषयमा सत्यतथ्य छानबिन गर्न पनि माग गरेको छ ।
पत्रकार सम्मेलनमा संस्थाका महासचिव मोहम्मद जाकिर हुसैनले वरिपरि डेढसय बढी सुरक्षाकर्मीको उपस्थिति रहेको ठांउमा दिउसो ११ बजे अपराधीहरुले आलमको हत्यागरि फरार भएपनि रोक्न नसक्नु दुर्भाग्यपूर्ण भएको बताए ।
उनले प्रत्येक एकदुई बर्षको अन्तरालमा मुस्लिम नेताहरुको हत्या हुंदै आएपनि राज्यले त्यसलाई रोक्न नसकेको बताए ।
गठबन्धनका केन्द्रीय संयोजक समीम मियाँ अन्सारीले यसअघिका हत्या प्रकरणहरुमा पनि बनेको छानबिन समितिले दिएका प्रतिवेदन सार्वजनिक नगर्ने गरिएको बताउंदै आलम हत्या प्रकरणको सम्पूर्ण विवरण सार्वजनिक गर्न माग गरे ।
उनले खुर्शीद आलमलाई दोषीकोरुपमा प्रचार गरिएकोमा आपत्ती जनाउदै घटनाको सत्यतथ्य छानबिन गर्न माग गरेका छन ।
नेकपाका केन्द्रीय सदस्य महफुज आलमले मृतक आलम सामान्य नागरिक रहेपनि एकहोरोरुपमा दोषीकोरुपमा प्रचारबाजी गरिएको भन्दै प्रचारबाजीले वास्तविक घटना ओझेलमा पर्नसक्ने चिन्ता ब्यक्त गरेका छन्।
