६ असोज, एजेन्सी ।
इङ्गलिस प्रिमियर लिग फुटबलमा आज दुई खेल हुँदैछन् । जसमा म्यानचेस्टर सिटी र आर्सनल तथा ब्राइटन र नटिङघम फरेस्ट खेल्दैछन् । सिटी र आर्सनलको खेल नेपाली समय अनुसार राति सवा ९ बजे शुरु हुनेछ । साविक वितेजा सिटी यो सिजन चार खेलमा अपराजित छ ।
दोस्रो स्थानमा रहेको सिटीको १२ अङ्क छ । समान चार खेलमा १० अङ्कका साथ आर्सनल पाँचौ स्थानमा छ । उसले तीन खेल जित्दा एक खेल बराबरी खेलेको छ । त्यसअघि आजै ब्राइटन र नटिङघम फरेस्ट पौने ७ बजे खेल्नेछन् । गएराति भएको खेलमा लिभरपुलले बर्नमाउथलाई र चेल्सीले वेस्टह्यामलाई समान ३–० गोलले हरायो ।
जीतसँगै लिभरपुल अङ्क तालिकाको शीर्ष स्थानमा पुगेको छ । लिभरपुलको पाँच खेलमा १२ अङ्क छ । चेल्सीको पाँच खेलमा १० अङ्क भएको छ । चेल्सी चौथो स्थानमा छ । एस्टनभिल्लाले उल्भ्सलाई ३–१ गोलले हरायो । समान पाँच खेलमा १२ अङ्क नै रहेको एस्टन भिल्ला तेस्रो स्थानमा छ ।
अरू खेलमा फुलहमले न्यूक्यासललाई र टोटनहमले बे्रन्टफोर्डलाई समान ३–१ गोलले नै हरायो । लेस्टरसिटी र एभर्टनले एक÷एक गोलको र म्यानचेस्टर युनाइटेड र क्रिस्टल प्यालेसले गोलरहित बराबरी खेलेका छन् ।
उता केलियन एमबाप्पेको गोलबाट प्रेरित रियल मड्रिडले स्पेनिस लिगमा जित निकालेको छ ।शनिबार राति रियल मड्रिडले एस्पेनयोललाई ४–१ ले हराएको हो । ला लिगाको आफ्नो तेस्रो खेलमा एमबाप्पेले चौथो गोल गरे । जसमा रियलले पुनरागमन जित निकाल्न सफल रह्यो ।
दोस्रो हाफको नवौं मिनेटमा गोलकिपर थिबाउ कोर्टोईसले आफ्नै पोस्ट जोफ्रे केरेरासको क्रसलाई छिराएपछि रियल खेलमा पछि परेको थियो । त्यसको चार मिनेटमा ड्यानी कार्भाजलले रियलका लागि बराबरी गोल फर्काए ।
ब्राजिली खेलाडी रोड्रिगो र भिनिसियस जुनियरले लगातार गोल गरेपछि रियल ३–१ को अवस्थामा पुगेको थियो । खेलको अन्तिम मिनेटमा एमबाप्पेले पेनाल्टीमा गोल गर्दै रियललाई ४–१ को शानदार जित दिलाए ।
रियलले लिगको सुरुवाती ६ खेल मध्य चार खेलमा जित निकालेको छ । रियल शीर्ष स्थानको बार्सिलोना भन्दा एक अंकले पछि छ । रियलको १४ अंक छ । एस्पेनयोल ७ अंक सहित तालिकाको १३ औं स्थानमा छ ।
यता ह्यारी केनले बुन्डेसलिगामा नयाँ कीर्तिमान राख्दा बायर्न म्युनिखले भने शानदार जित निकालेको छ । ह्यारी केन प्रेरित बायर्नले जर्मन बुन्डेसलिगामा बेर्डन ब्रेमेनलाई ५–० ले हराएको छ । केन बुन्डेसलिगाको ईतिहासमा सबैभन्दा धेरै लिग गोल गर्ने पहिलो ईङ्लिस खेलाडी बनेका छन् ।
उनले ४१ लिग गोल गरेका छन् । माइकल ओलिस र जमाल मुसियालाले पहिलो हाफमै बायर्नलाई सहज अग्रता दिलाएका थिए । ओलिसले दोस्रो हाफका दोस्रो गोल थपेपछि केनले गोलकिपरलाई समेत छलाएर गोल गरेका थिए । सर्ज गनाब्रीले बायर्नका लागि पाँचौं गोल
गरे । ईङ्ल्याण्डका जाडोन सान्चोले बुन्डेसलिगामा ४० औं गोल गरेका थिए । उनले बोरुसिया डर्टमण्डबाट यो इतिहास राखेका थिए । तर उनलाई ईङ्ल्याण्डका कप्तान केनले पछि पारेका छन् । जित सहित बायर्नले चार खेलमा शतप्रतिशत जित सहित तालिकाको शीर्ष स्थानमा आफुलाई राख्न सफल भएको छ ।
