१० वैशाख , काठमाण्डौ ।
देशमा शान्ति सुरक्षा कायम राख्ने,सुरक्षित समाजको पहरेदार,राष्ट्र सेवक प्रहरी अधिकृतमाथि नै बलात्कार जस्तो गम्भिर विषयमा फसाईदिने भन्दै ३० लाख रुपैयाँ लिएको गम्भिर आरोप लागेको छ ।
यस्तै सहकारी ठगी प्रकरणमा जीबी राईलाई ब्यापक खोजि गरिरहेपनि अहिलेसम्म फेला पार्न नसकेको प्रहरीले इन्टरपोलको सहयोगमा ३ जना अभियुक्तलाई पक्राउ गरेको छ।ललितपुरस्थित प्रहरी प्रभाग भैंसेपाटीमा कार्यरत इन्स्पेक्टर बिनुकुमारी शाहीको जिम्मेवारी खोसिएको छ।
उनलाई जिम्मेवारीबाट फिर्ता बोलाउने निर्णय भएको उपत्यका प्रहरी कार्यालयका एसएसपी विनोद घिमिरेले बताएका छन् । इन्स्पेक्टर बिनुकुमारीमाथि आर्थिक अपचलन गरेको आरोप छ। शाहीमाथि बलात्कार मुद्दामा फसाइदिने भन्दै पैसा खाएको आरोप लागेपछि छानबिन थालिएको छ ।
काठमाडौं उपत्यका प्रहरी कार्यालले शाहीलाई जिम्मेवारीबाट हटाएर छानबिन अघि बढाएको हो । घटनाको छानबिनका लागि डीएसपीको संयोजकत्वमा ७ सदस्यीय समिति बनाइएको प्रहरी स्रोतले बताएको छ ।
ललितपुर प्रहरी परिसरका डीएसपी नरहरी अधिकारीको संयोजकत्वमा छानबिन समिति बनाइएको छ । छानबिन भइरहेकाले शाहीलाई जिम्मेवारीबाट हटाएर तानिएको काठमाडौं उपत्यका प्रहरी कार्यालय प्रमुख किरण बज्राचार्यले पनि पुष्टि गरेकी छन् ।
उनीमाथि हनी ट्रयापको घटनामा बलात्कारमा फसाइदिने भन्दै युवतीसँग मिलेर ३० लाख पैसा लिएको पाइएको छ । शाहीमाथि एक जना व्यक्तिलाई नियन्त्रणमा लिएर ३० लाख रुपैयाँ लेनदेन गरेको आरोपपछि काठमाडौं उपत्यका प्रहरी कार्यालय रानीपोखरीले छानबिन गर्न समिति गठन गरेको छ ।
छानबिन गर्न कार्यालयले उनको जिम्मेवारी पनि खोसेको छ। परिसरले यस घटनामा दुई जनालाई पक्राउ गरी अनुसन्धान गरिरहेको प्रहरीले जनाएको छ। आपराधिक लाभ लिन नहुने कसुरमा उनीहरूमाथि अनुसन्धान भइरहेको हो।
यसैबीच सहकारी ठगी प्रकरणमा इन्टरपोलबाट ब्यापक खोजी भइरहेका जीबी राईलाई समात्न नसकेको प्रहरीले इन्टरपोलकैसहयोगमा फरार तीन अभियुक्तलाई पक्राउ गर्न सफल भएको छ ।
इन्टरपोलबाट रेड नोटिस जारी भएका ३ जनालाई पक्राउ गरेर काठमाडौं ल्याइएको छ । पक्राउ पर्नेमा भूपेन्द्र बोहोरा, कबिर बुढाथोकी उर्फ रियाज, रोमन कार्की छन् । अन्तर्राष्ट्रिय प्रहरी संगठन (इन्टरपोल) को सहयोगमा उनीहरूलाई दुबईमा पक्राउ गरेर नेपाल ल्याइएको प्रहरी प्रधान कार्यालयले जनाएको छ ।
बोहरा र बुढाथोकी ठगी मुद्दा फरार थिए । रोमन कार्की बलात्कार मुद्दा फरार थिए । प्रहरीको फरार र सर्वाधिक खोजीको सूचीमा रहेका ओखलढुंगाका गितेन्द्रबाबु (जीबी) राई अझै पनि इन्टरपोलकै खोजी सूचीमा छन् ।
तर उनी मलेसियामा रहेको बताइएपनि नेपाल प्रहरीले उनलाई पक्राउ गरेर स्वदेश ल्याउन सकेको छैन् । केही साता अधि मात्रै जीबीको खोजीमा मलेसिया पुगेको नेपाल प्रहरी खाली हात फर्किएको थियो ।
उनलाई पक्राउ गर्न प्रहरीको अन्तर्राष्ट्रिय अपराध संगठन इन्टरपोलमार्फत ’रेड नोटिस’ जारी छ । उनी मलेसियामा रहेको खुले पनि त्यहाँको प्रहरीले उनलाई पक्राउ गरेर नेपाल फर्काउन इन्कार गर्दै आएको छ ।
गोर्खा मिडिया प्रा.लि.का अध्यक्ष गितेन्द्रबाबु (जीबी) राई र उनको समूहले नेटवर्किङ्ग व्यवसायको नेटवर्क प्रयोग गरी सहकारी खोलेर बचतकर्ताको १६ अर्ब रुपैयाँभन्दा बढी रकम दुरूपयोग गरेको आरोप छ ।
