५ कार्तिक , काठमाण्डौ।
सार्वजनिक कार्यक्रममा विरोधको सामना गरिसकेका प्रधानमन्त्री केपी शर्मा ओलीले संस्कृतिभित्र राजनीतिको रोटी सेक्ने प्रवृत्ति गलत हुने बताएका छन्। प्रधानमन्त्री निवास बालुवाटारमा आज ‘नेपाल संवत् न्हु दयाँ ११४५ समारोह समिति’ले दिएको ध्यानाकर्षणपत्र बुझ्दै प्रधानमन्त्री ओलीले नेपालको मौलिक संस्कृति र परम्पराभित्र राजनीति घुसाएर भाँडभैलो गर्ने तरिका उचित नहुने बताएका हुन्।
काठमाडौं महानगरपालिकाका मेयर बालेन शाहका समर्थक बालेनको फोटो अंकित टिर्सटसहित इन्द्रजात्रामा सहभागी भएकोतर्फ संकेत गर्दै उनले मौलिक संस्कृति र परम्पराभित्र राजनीति घुसाएर भाँडभैलो गर्ने तरिका उचित नहुने बताए ।
प्रधानमन्त्री आउने थाहा पाएर बालेनका समर्थकहरु उनको फोटो अंकित टिसर्टसहित बसन्तपुरमा पुगेपछि प्रहरीले उनीहरुलाई पक्राउ गरी साझ छाडेको थियो । यस्तै गत १० भदौमा गौर पर्व मनाउन प्रधानमन्त्री टुँडिखेल पुग्दा प्रधानमन्त्री ओली र शेरबहादुर देउवा लगायत नेताविरुद्ध नाराबाजी भएको थियो ।
सो कार्यक्रममा प्रधानमन्त्री ओली र कांग्रेस सभापति शेरबहादुर देउवाविरुद्ध नाराबाजी भएको थियो । सो कार्यक्रममा देउवा त निक्कै आक्रोशित रुपमा प्रस्तुत भएका थिए । भने ओली छोटो मन्तब्यसहित कार्यक्रमबाट बाहिरिएका थिए ।
सो कार्यक्रममा समेत सुरक्षा प्रवन्धको विषयलाई लिएर प्रश्न उठेको थियो । त्यस पश्चात बालेनसँगको वाकयुद्धकै कारण प्रधानमन्त्रीले अनफलो अभियानको समेत सामना गरिसकेका छन् । ‘राजनीति र अर्थतन्त्र बिग्रिएमा केही वर्षमा माथि उठाउन सकिन्छ, तर संस्कृतिमा अधपतन भएमा यसलाई उठाउन वर्षौं लाग्न सक्छ । यसतर्फ हामी सचेत हुनुपर्छ,’ उनले भने ।
इन्द्रजात्राजस्ता पर्वहरुमा भएका कतिपय भड्काउपूर्ण गतिविधिप्रति असन्तुष्टि व्यक्त गरे ।उनले नेवारी संस्कृतिभित्र आदिवासी, शास्त्रीय र अत्याधुनिक वाद्यवाधन तथा विशेष धूनहरु रहेको र यसको संरक्षणमा भइरहेका प्रयासको प्रशंसा पनि गरे ।
सो अवसरमा समितिका अध्यक्ष एवं पूर्वमन्त्री राजेन्द्र श्रेष्ठले नेपाल संवतलाई सरकारी कामकाजको प्रयोगमा ल्याउन २०८० कात्तिक २७ गतेको मन्त्रिपरिषद्बाट भएको निर्णयलाई सबै तह र निकायमा कार्यान्वयन गर्न माग गरे ।
उनले राष्ट्र बैंकबाट निष्कासन हुने नोटमा नेपाल संवत्को पनि प्रयोग गर्न र विदेशस्थित नेपाली नियोगहरुमा नेपाल संवतको नयाँ वर्षमा ‘नेपाल डे’ मनाउन आग्रह गरे । राष्ट्रिय विभूति शंखधर साख्वाः प्रतिष्ठानका अध्यक्ष ज्ञानराम श्रेष्ठले सरकारी निकायमा नेपाल संवतको प्रयोगको अवस्थाबारे अनुगमनको व्यवस्था गर्न सुझाव दिए ।
सरकारले २०६५ मा साख्वालाई राष्ट्रिय विभूति घोषणा गरेको थियो । यस वर्षको नेपाल संवत् ११४५ कछलाथ्व पारु यही कात्तिक १७ गते मनाइँदैछ। उक्त दिन बिहान भक्तपुरको मध्यपुर थिमीस्थित साख्याको प्रतिमामा माल्यार्पण र काठमाडौँको वसन्तपुरमा विशेष कार्यक्रम हुनेछ ।
समारोह समिति र प्रतिष्ठानले ती कार्यक्रममा प्रधानमन्त्री ओलीलाई प्रमुख अतिथ्यताका लागि निमन्त्रणा दिएको छ । प्रधानमन्त्रीले अमेरिकामा समेत विरोधको समाना गर्नुपरेको थियो । असुरक्षाकै कारण उनी सहभागी हुने नेपाली समुदायसँगको कार्यक्रम स्थगित गरिएको थियो ।
पछिल्लो समय राष्ट्रिय स्वतन्त्र पार्टीका सभापति सहकारी प्रकरणमा पक्राउ परेपछि ओली झनै आलोचनाको केन्द्रमा छन् । स्वयम रविले नै ओली देशकै सबैभन्दा ठूलो भ्रष्टाचारी भएको भन्दै सरकार परिवर्तनमा जुट्न घरघरबाट बाहिर निस्किन अपिल गरेका छन् ।
रास्वपाका नेता कार्यकर्ताहरुले समेत सडकबाट अहिले ओलीको बर्हिगमन र राजीनामा माग गरिरहेका छन् ।
