२० मंसिर, काठमाण्डौ ।
नेपाली राष्ट्रिय महिला फुटबल टिमकी कप्तान एवम् गोलकिपर अन्जिला तुम्बापो सुब्बाले ग्रीसको सुपर लिग क्लब नीस अत्रोमितोउबाट खेल्ने भएकी छन् । उनको वायोपिक ‘अन्जिला’ बनेको छ र यसको प्रिमियरका लागि उनी शुक्रबार हङकङ जांदैछिन् ।
उनी त्यतैबाट १२ डिसेम्बरमा ग्रिसको राजधानी एथेन्स उड्नेछिन् । युरोपेली फुटबल लिग खेल्ने दोस्रो नेपाली बन्ने संघारमा रहेकी उनलाई वायोपिकको टिमले वुधबार बिदाई गरेको छ । ‘लामो प्रयासपछि युरोपेली फुटबलमा पाएको अवसरमा एकदम खुशी लागेको छ,’ २७ वर्षीया अन्जिलाले भनिन्, ‘सुपर लगमा उत्कृष्ट प्रदर्शन गर्दै अरु नेपाली खेलाडीका निम्ति पनि युरोपेली फुटबलमा अवसर खोल्न चाहान्छु ।’
उनले स्वीडिस एजेन्टमार्फत् नीस अत्रोमितोउसँग गत सेप्टेम्बर, २०२४ मै सम्झौता गरेकी थिइन् । तर, भिसा प्रक्रिया र साफ महिला च्याम्पियनसिप २०२४ खेल्न राष्ट्रिय टिमसँग रहेकाले उनले ग्रिक सुपर लिगका सुरुआती खेल गुमाएकी छिन् ।
उनले क्लबसँग मे, २०२५ सम्मका लागि हस्ताक्षर गरेकी छन् । यसबीच नेपाली राष्ट्रिय फुटबल टिमका कप्तान किरण चेम्जोङले फुटबलमा नेपालको पहिलो बायोपिक चलचित्र बन्दा खुसी लागेको बताएका छन् ।
बुधवार काठमाडौँमा चलचित्र अञ्जिलाको बारेमा आयोजित अन्तरसंवादमा बोल्दै कप्तान चेम्जोङले फुटबलको क्षेत्रमा नेपालको पहिलो बायोपिक चलचित्र बन्दा खुसी लागेको बताएका हुन्। उनले अञ्जिला चलचित्रले १ अर्ब कमाउनेमा विश्वस्त रहेको बताए ।
चलचित्र अञ्जिलाको निर्माण टिमले हिजो काठमाडौँमा अन्तरसंवाद गरेको थियो । जसमा नेपाली राष्ट्रिय पुरुष फुटबल टिमका कप्तान चेम्जोङ, महिला राष्ट्रिय फुटबल टिमकी कप्तान अञ्जिला तुम्बाहापो, प्रतिनिधिसभा सदस्य एवं नेकपा एमालेका सांसद सुहाङ नेम्वाङ रहेका थिए ।
चलचित्र नेपाली राष्ट्रिय महिला फुटबल टिमकी कप्तान अञ्जिलाको जीवनीमा केन्द्रित छ । कार्यक्रममा बोल्दै कप्तान अञ्जिलाले पहिलोपटक युरोपमा खेल्न जाने मौका मिलेको भन्दै खुसी व्यक्त गरिन् ।
कार्यक्रममा बोल्दै नेकपा एमाले सांसद सुहाङ नेम्वाङले अञ्जिलाको जीवनीबाट सपनाको कुनै पनि सिमाना नहुने प्रमाणित हुने बताए । खेलेरै जीवन बनाउन सकिन्छ भन्ने प्रमाणित भएको उनले बताए ।
निर्देशक मिलन चाम्सले चलचित्र निकै रोचक रहेको बता ए। अञ्जिलाको संघर्ष र सफलताका कुरा कथामा समेटिएको र कथाले अन्य खेलाडीलाई प्रेरणा मिल्ने बताए । निर्देशक चाम्सले चलचित्र हेर्न जान सबै दर्शकलाई आग्रह गरे ।
चलचित्र अञ्जिला माघ ११ गतेबाट देशभर प्रदर्शन हुँदै छ । चलचित्रमा अञ्जिला स्वयंको मुख्य भूमिका रहेको छ भने दयाहाङ राई, मिरुना मगर, सिर्जना सुब्बा, माओत्से गुरुङ, बुद्धि तामाङ, विजय बराल, हरि खड्का लगायतको अभिनय छ ।
