१३ माघ , एजेन्सी ।
इङ्लिस प्रिमियर लिग र स्पेनिस ला लिगाका शनिबार रातिका खेलहरूमा दुवै शीर्ष टोलीहरूले प्रभावशाली प्रदर्शन गर्दै आफ्नो प्रभुत्व कायम राखेका छन्। साविक विजेता म्यानचेस्टर सिटीले चेल्सीमाथि शानदार जित हासिल गर्दा, रियल म्याड्रिडले ला लिगामा आफ्नो अग्रता थप सुदृढ बनाएको छ।
इत्तिहाद स्टेडियममा भएको खेलमा सिटीले चेल्सीलाई ३–१ गोल अन्तरले हराएको छ । सिटीको जितमा जोस्को ग्यार्डियोल, एर्लिङ हालान्ड र फिल फोडेनले एक÷एक गोल गरे । चेल्सीमाथिको जितसँगै सिटी अंक तालिकाको शीर्ष चारमा फर्किएको छ ।
लिगमा २३ खेलबाट ४१ अंक बनाएको सिटीले १२ खेलमा जित, १५ खेलमा बराबरी र ६ खेलमा हार भोगेको छ । समान ४१ अंक नै भएको न्युक्यासलले उस्तै नतिजामा अंक तालिकाको पाँचौँ स्थानमा छ । यी दुई टोली शीर्ष पाँचमा अटाउन सर्घष गर्दै छन् ।
समान खेलबाट ४० अंक भएको चेल्सी भने छैटौँ स्थानमा छ । गएराति नै भएको खेलमा न्यु क्यासलले भने साउथहेप्टनलाई ३–१ ले हराएको थियो । अर्को खेलमा वर्नमाउथले नटिङघम फरेस्टलाई ५–० ले तथा एभर्टनले ब्राइटनलाई १–० ले पाखा लगायो ।
लिभरपुलले इप्स्विच टाउनलाई ४–१ ले हरायो । यस्तै दोस्रो स्थानको आर्सनलले वल्भ्समाथि कठिन जित निकाल्यो । आर्सनलले वल्भ्सलाई १–० ले कठिन रुपमा पराजित गरेको हो । वल्भ्सको घरेलु मैदानमा ७४औं मिनेटमा रिकार्डो क्लाफायोरीले गरेको गोल नै आर्सनलका लागि निर्णायक भयो ।
जितपछि आर्सनल २३ खेलमा ४७ अंकका साथ दोस्रो स्थानमा छ । वल्भ्स २३ खेलमा १६ अंकका साथ रेलिगेसनको नजिक छ । यता रियल म्याड्रिड स्पेनिस ला लिगामा थप मजबुत भएको छ। रियल भालाडोलिडलाई शनिवार ३–० ले हराउँदै रियलले दोस्रो टोलीसँगको अंक दूरीलाई अझै बढाएको छ ।
यसमा केलियन एम्बाप्पेले ह्याट्रिक पूरा गरे । ३० औं मिनेटमा पहिलो गोल गरेका एमबाप्पेले ५७ औं मिनेटमा अर्को गोल थपे । इन्ज्युरी समयमा पेनाल्टीमा गोल गर्दै एम्बाप्पेले ह्याट्रिक पूरा गरे । रियलबाट पहिलो ह्याट्रिक गरेका एम्बाप्पेको यो सिजन १५ गोल पुगेको छ ।
उनले ह्याट्रिक गर्दै रियलको जित पक्का मात्र गरेनन्, लिगमा आफ्नो गोल्डेन बुटको दाबेदारी पनि बलियो बनाएका छन्। रियलको २१ खेलबाट ४९ अंक भएको छ । दोस्रो स्थानको एलेटिको म्याड्रिड समान खेलबाट ४५ अंक छ ।
एटलेटिकोले भिल्लारियलसँग १–१ को बराबरी खेले । अन्य खेलमा रियल बेटिसले मालोर्कालाई १–० ले हरायो । लस पालमस र ओसासुना तथा सेभिल्ला र इस्पानुयलले १–१ को बराबरी खेले ।
