१८ माघ , एजेन्सी ।
अमेरिकामा बुधबार राति आश्चर्यजनक रुपमा आपसमा ठोकिएर विमान र हेलिकप्टर खसेको नदीमा जारी शवको खोजीकार्य रोकिएको छ। विमानका ६४ र सैन्य हेलिकप्टरका ३ गरी दुर्घटनामा परेका ६७ जनामध्ये अहिलेसम्म ४० शव मात्र शव फेला परेको छ।
विमान खसेको पोटोम्याक नदीको पानी अत्यन्तै चिसो भएकाले उद्धार तथा खोजीमा कठिनाइ भइरहेको समाचार आइरहेका बेला उद्धार टोलीले ‘खतरनाक अवस्थाका कारण’ काम रोकेको बताएका छन् ।
सीबीएस न्युजका अनुसार गोताखोरहरूले सुरक्षित रूपमा पुग्न सकिने सबै ठाउँमा खोजी गरिएको बताएका छन्। अब नदीमा दुर्घटनाग्रस्त विमानका भग्नावशेष हटाइएपछि र अवस्था सुरक्षित भएपछि मात्रै पुनः काम सुरु गर्ने उनीहरूले बताएका छन्।
बुधबार राति कान्सासबाट वासिङ्टन आउँदै गरेको बम्बार्डियर कम्पनीको सीआरजे ७०० विमान रेगन राष्ट्रिय विमानस्थलमा अवतरण गर्न अगाडि बढ्दै गर्दा अमेरिकी सेनाको ब्ल्याक हक हेलिकप्टरले ठक्कर दिँदा दुवै पोटोम्याक नदीमा खसेर दुर्घटनाग्रस्त भएका थिए।
विमानमा चालक दलसहित ६४ जना थिए भने हेलिकप्टरमा ३ सैनिक थिए। दुर्घटनामा सबै जनाको मृत्यु भएको निष्कर्षमा अमेरिकी अधिकारीहरू पुगेका छन्। यद्यपि अहिलेसम्म ४० भन्दा बढी शव मात्र निकालिएको सीएनएनले जनाएको छ।
यसैबीच दुर्घटनामा मृत्यु भएकाहरूमा २ जना चिनियाँ नागरिक पनि रहेको चिनियाँ सञ्चारमाध्यमले जनाएको छ। दुर्घटनाग्रस्त विमानको भग्नावशेष नदीबाट निकालेर अवस्था सुरक्षित भएपछि गोताखोरहरूले खोजी कार्य पुनः सञ्चालनमा ल्याउने बताइएको छ ।
खोजी कार्यका क्रममा ब्ल्याक बक्स अर्थात विमानको फ्लाइट डाटा रेकर्डर र ककपिट भ्वाइस रेकर्डर फेला परेको अधिकारीहरुले बताएका छन् । बीबीसीको अमेरिकीसम्बद्ध संस्था सीबीएस न्युजलाई एक स्रोतले यो जानकारी दिएको हो ।
सीबीएसका अनुसार ब्ल्याक बक्सलाई राष्ट्रिय यातायात सुरक्षा बोर्डको प्रयोगशालामा जाँच गरिने छ । यसैबीच बुधबार रेगन राष्ट्रिय विमानस्थल नजिकै अमेरिकी ईगल फ्लाइट ५३४२ र आर्मी ब्ल्याक हक हेलिकप्टरको टक्कर हुनुभन्दा २४ घण्टा अघि, अर्को जेट त्यहाँ अवतरण गर्न खोज्दा पनि हेलिकप्टर यसको उडान मार्ग नजिकै देखा परेपछि अवतरणका लागि दोस्रो प्रयास गर्नुपरेको वासिङटन पोस्टले उल्लेख गरेको छ ।
हवाई यातायात नियन्त्रणबाट आएको अडियो रेकर्डिङ अनुसार त्यो विमान, रिपब्लिक एयरवेज फ्लाइट ४५१४ दोस्रो प्रयासमा सुरक्षित रूपमा अवतरण भएको थियो । त्यसको २४ घण्टापछि अमेरिकी एयरलाइन्सको बम्बार्डियर कम्पनीको सीआरजे ७०० विमान हेलिसँग ठोक्किएको थियो ।
यो दुर्घटनालाई अमेरिकी राष्ट्रपति र विज्ञहरुले समेत आश्चर्यका रुपमा लिएका छन् । ‘हेलिकोप्टरले किन बाटो परिवर्तन गरेन ?’ भन्दै ट्रम्पले प्रश्न गरेका छन् । उनले लेखेका छन्, “विमान विमानस्थलतर्फ जाँदै थियो ।
हेलिकोप्टर सिधै विमानतर्फ गइरहेको देखिन्छ । यो रात स्पष्ट थियो । विमानको बत्ती पनि बलिरहेको थियो । त्यसो हुँदा पनि हेलिकोप्टर किन घुमेन ? वा किन माथि या तल गएन ?” “यदि कन्ट्रोल टावरले विमान देखेको थियो भने किन हेलिकोप्टर चालक दललाई के गर्ने भनेर बताएन ? यो नराम्रो अवस्था हो । यस्तो हुनबाट रोक्नुपर्ने थियो । यो ठीक होइन ।”
उनले भनेका छन् , यस्तै विज्ञले पनि अमेरिकामा हवाइजहाज र हेलिकोप्टर ठोक्किएर भएको दुर्घटनामा आफूलाई अचम्मित बनाएको बताएका छन् । बीबीसीसँग कुरा गर्दै अमेरिकी उड्डयन सल्लाहकार जेफ्री थोमसले दुर्घटनाले आफूलाई अचम्मित बनाएको बताएका छन् ।
